04 июня 2014 г.
Вăрмана кайсан сирĕн кĕлеткене сăвăс кĕрсе ларасран асăрханăр. Мĕншĕн тесен сăвăс энцефаличĕ çак кăпшанкă сурчăкĕ урлă ерет. Энцефалит _ пуç мими шыçни. Наркăмăшланнă хыççăн пĕр е икĕ-виçĕ эрнерен тин чирленине пĕлме пулать. Кĕлетке температури 38-39 градус таран ỹсет, шăнтса пăрахать, пуç, кĕлетке ыратать, куç шурри хĕрелет. 3-5-мĕш кунхине шăнăр туртма пуçлать, çын аташать, кĕлетке хусканăвĕсем улшăнаççĕ. Çынна шалкăм çапма пултарать. Чирлĕскерне тỹрех больницăна ăсатмалла. Кĕлеткене сăвăс ĕмсе çыпçăннине тупсан ăна хăвăртрах кăларма тăрăшăр _ мĕнле хăвăртрах кăларатăр, энцефалитпа наркăмăшланас хăрушлăх çавăн чухлĕ сахалрах. Сăвăса кăларас тесен вăл кĕрсе ларнă вырăна ỹсен-тăран çăвĕ ямалла, унтан питĕ асăрханса пинцетпа е çиппе çаклатса тĕнĕлĕ тавра çавăрса (вращая вокруг оси) кăлармалла. Туртса кăларнă хыççăн аманнă вырăна тепĕр хут сăнăр _ сăвăс пуçĕ татăлса юлман-и? Юлнă пулсан ăна та асăрханса кăлармалла, унтан йодпа е спирт растворĕпе дезинфекцилемелле. Сăвăсран сыхланас тесен: - июнь уйăхĕнче вăрмана кайма ан тăрăшăр; - вăрмана каймаллах пулсан çутă (шурă) тĕслĕ çи-пуç е плащ, капюшонлă куртка тăхăнăр; - çири япаласен çаннисем вăрăм, резинкăллă пулччăр, йĕмсене нуски ăшне чикĕр; - вăрăм курăк тата тĕмсем хушшипе çỹреме ан тăрăшăр; - хăвăра час-часах сăнăр, киле таврăнсан çи-пуçа тата атă-пушмака лайăх тĕрĕслĕр, силлĕр; - дачăра вăрăм курăка çулсах тăрăр, апат юлашкисене ан пăрахăр. Роспотребнадзорăн Чăваш Республикинчи Управленийĕн Çĕмĕрлери территори уйрăмĕ.