Публикации » Экзамена телефон илсе кĕртнĕ

04 июня 2014 г.

Кăçал патшалăхăн пĕрлехи экзаменĕсене шкул пĕтерекен пĕтĕм çамрăка пĕрешкел шанăçпа условисем туса парас тесе çирĕпрех йĕркепе ирттереççĕ. Тĕп тĕллев _ ППЭ уçă та ултавсăр пултăр. Патшалăхăн пĕрлехи экзаменне тытмалли йĕрке çулран-çул çирĕпленсе пырать пулин те ăна пăсакан çав-çавах тупăнать. Кăçал экзамена кĕрес умĕн хĕр упраçпа яш-кĕрĕме металл шыракан ятарлă хатĕрпе тĕрĕслеççĕ. Апла пулин те республикăра тăватă çамрăк экзамена сотовăй телефон йăтса кĕме май тупнă. Кун пекки майăн 29-мĕшĕнче вырăс чĕлхипе экзамен тытнă чухне пулнă. Тăватă ача телефонпа усă курнине тупса палăртнă, çавна май халĕ вĕсен кăтартăвĕсене шута илмĕç. Йĕркене пăсакансем Шупашкарти икĕ шкулта, Вăрмар тата Елчĕк районĕсенче пулнă, вĕсене видеосăнав пулăшнипе тупса палăртнă. Тăваттăшĕнчен иккĕшĕ _ кăçал шкул пĕтерекенсем, иккĕшĕ _ пĕлтĕрхисем. Халĕ вĕсем çак экзамена çитес çул çеç тытĕç. ЧР вĕренỹ министрĕ Владимир Иванов шкул пĕтерекенсене патшалăх экзаменĕсене сотовăй телефонсемсĕр тата шпаргалкăсемсĕр кайма чĕнсе калать.

А.ТИМОФЕЕВА.