04 июня 2014 г.
Чăваш Ен Пуçлăхĕ 2014 çулхи май уйăхĕн 17-мĕшĕнче Чăваш Республикин муниципалитет йĕркеленĕвĕсене граждансем коммуналлă пулăшу ĕçĕсемшĕн хывакан тỹлев виçин улшăнăвĕсен индексĕсем çинчен калакан Указа алă пуснă. Документа Раççей Федерацийĕн Çурт-йĕр кодексĕпе РФ Правительствин 2014 çулхи апрель уйăхĕн 30-мĕшĕнчи çĕр-шывра граждансем коммуналлă пулăшу ĕçĕсемшĕн хывакан тỹлев виçин улшăнăвĕсен индексĕсене йĕркелекен никĕс çине таянса çирĕплетнĕ постановленийĕпе килĕшỹллĕн йышăннă. ЧР Конкурент политики тата тарифсен патшалăх службин ертỹçин çумĕ Марина Кадилова Правительство çуртĕнче иртнĕ пресс-конференцире тỹлев виçин 2014 çулхи улшăнăвĕсемпе паллаштарчĕ. Марина Витальевна каланă тăрăх _ Чăваш Республикинче граждансем коммуналлă пулăшу ĕçĕсемшĕн тỹлекен виçен улшăнăвне кăçалхи июль уйăхĕнчен пуçласа 6,9 процент тесе палăртнă. Граждансем 2014 çулхи июль уйăхĕн 1-мĕшĕнчен вăтамран 3,9 процент ытларах тỹлеме тытăнĕç, чи пысăк улшăну 4,9 процент пулĕ; электроэнерги _ 4 процент, çут çанталăк газĕ 4,2 процент хакланĕ. Халăха канăç паман ыйтусенчен пĕри _ çуртсене хутса ăшăтнăшăн епле тỹлесси. Пирĕн тăрăхра ку тапхăр 7 уйăхпа (октябрь уйăхĕнчен пуçласа апрель уйăхне çитиччен) танлашать. Хăш-пĕр муниципалитет йĕркеленĕвĕнче çĕнĕ йĕркепе усă кураççĕ, ăшă парса тăнин чăн хакне çеç тỹлеççĕ. Çынсем çакăнпа кăмăллă. Малашне вăл пур çĕрте те вăя кĕрĕ. Коммуналлă пулăшу ĕçĕсемшĕн тỹлев çулла _ пĕчĕкрех, хĕлле 7 уйăхра пысăкрах пулĕ. Строймин çуртсене ăшă парса тăрас тĕлĕшпе пулас улшăнусене шута илсе коммуналлă пулăшăвăн çĕнĕ нормативĕсене туса хатĕрленĕ. Г.ГРИГОРЬЕВ.