Публикации » Ĕç шавĕ чакмасть

04 июня 2014 г.

Çурхи ака кампанийĕ вĕçленчĕ пулин те районти ял хуçалăх производство предприятийĕсенче ĕç шавĕ чакмасть. Çакă тепĕр яваплă тапхăрпа _ выльăх апачĕ хатĕрлессипе _ çыхăннă. Выльăх-чĕрлĕх продуктивлăхĕ, унпа пĕрлех предприяти тупăшĕ те, апата мĕнле майпа хатĕрленинчен тата пахалăхĕнчен килет. Шăпах выльăх апачĕ янтлассипе çыхăннă ĕçсем пыраççĕ те халĕ, сăмахран, "Коминтерн" ЯХПК-ра. Трапайри сĕт комплексĕ патĕнче пысăк калăпăшлă ĕç йĕркеленĕ: силоспа сенаж траншейине пысăклатаççĕ. Выльăх апатне янтлас, упрас тĕлĕшре траншейăна хывасси анлă сарăлнă технологи шутланать. Хăй вăхăтĕнче комплекс çывăхĕнче сенажпа силос валли пилĕк траншея тунă пулнă. Кашни траншейине 450 тонна яхăн симĕс масса хывнă. Малашне кашни траншейăна 650 тонна симĕс апат хывасшăн. Тĕмепе танлаштарсан траншейăра силос аван упраннине хуçалăх ертỹçи Альбина Новикова та палăртать. Çавна шута илсе траншейăна тăхăр метр тăсма шутланă. Ку ĕçе "Кỹкеçри строительство организацийĕ" пурнăçлать. Хуçалăх темиçе çул ĕнтĕ унпа тачă çыхăнса ĕçлет. Строительство ĕçĕсем "Нива" хуçалăхра та пыраççĕ. Кунта тыр-пул хумалли çĕнĕ склад çĕкленет. Пилĕк çынран тăракан бригада халĕ склад стенисене блокран хăпартать. А.ДМИТРИЕВА.