09 июня 2014 г.
Майăн 30-мĕшĕнче Муркаш районĕнче Чăвашпотребсоюз Чăваш Республикин Информаци политикин тата массăллă коммуникацисен министерствипе тата ЧР Журналистсен союзĕпе пĕрле массăллă информаци хатĕрĕсен ĕçченĕсен республикăри семинар-канашлăвне ирттерчĕ. Вун тăваттăмĕш хут йĕркеленĕ семинара ЧР информаци политикин министрĕ Валентина Андреева, Чăвашпотребсоюз ертỹçи Валерий Павлов, Муркаш район администрацийĕн çумĕ Владислав Ананьев, райпо председателĕ Борис Андреев хутшăнчĕç. Муркаш райповĕ республикăра та, Раççей шайĕнче те ăнăçлă ĕçлесе пыракан коллективсенчен пĕри. Çакна Центросоюз потребительсен кооперацийĕн тытăмĕнчи 2013 çулхи ĕç-хĕле пĕтĕмлетнĕ май çирĕплетнĕ _ Муркаш райповĕ йăла ыйтăвĕсене тивĕçтерессипе 1-мĕш вырăна, ĕç-хĕл тухăçлăхне ỹстерессипе 2-мĕш вырăна тивĕçнĕ. Республика шайĕнче çак тытăмăн кăçалхи пĕрремĕш квартал ĕç-хĕлне пĕтĕмлетнĕ тăрăх асăннă райпо пĕтĕмĕшле ĕç-хĕле йĕркелессипе чи пултарулли пулнă. Мăн Сĕнтĕр райповĕ те тухăçлă ĕçленине палăртмалла, вăл тăватă кăтартупа 1,2,3-мĕш вырăнсенче. Потребкоопераци тытăмĕн аталанăвĕ паянхи кун районта ырă тĕслĕхре. Социаллă сферăра потребитель пĕрлĕхĕ пысăк пĕлтерĕшлĕ. Çак тытăмра 700 яхăн çын вăй хурать, тивĕçлĕ ĕç укçи илет. 2013 çулшăн икĕ райпо 70 миллион тенке яхăн налук тата ытти шайри бюджета тĕрлĕ тỹлев куçарнă. Семинар-канашлăвăн пĕрремĕш пайĕнче журналистсем Муркаш райповĕн çитĕнĕвĕсемпе вырăна çитсе паллашрĕç. Чăвашпотребсоюз Канашĕн председателĕ Валерий Павлов Муркаш райповĕн çитĕнĕвĕсем чăннипех курăмли çинче чарăнса тăчĕ. Муркаш салинче çĕнĕ "Бриз" ресторан хута кайнă. Строительство ĕçĕсене пĕлтĕр май уйăхĕнче пуçланă та октябрь уйăхĕнче вĕçленĕ. Паянхи куна официантсем килекенсенчен саккас планшетсемпе усă курса илеççĕ. Саккасĕ вара официант кухньăна каймасăрах поварсем патне çитет. Клиентсене апат хакне, блюдăсен калорине, виçине принтерпа кăларса саккаса пурнăçличченех илсе килсе параççĕ. Районта строительство ĕçĕсем анлă сарăлнине кура ял çыннисене пулăшас тĕллевпе строительство материалĕсен лаптăкне йĕркеленĕ, 3 млн та 700 пин тенкĕ парса ятарласа машина-манипулятор туяннă. Материалсене халăха хапха умне çитерсе пушатсах параççĕ. Халăх ытларах кирпĕч, тимĕр, цемент, керамблок тата ытти материал туянать. Строительство материалĕсен лаптăкĕсене республикăри кашни райпорах йĕркелеме палăртаççĕ. Муркаш район центрĕнчи КБО çуртне те райпо илнĕ. Кунта вара халăха валли парикмахерски, илем салонĕ, тумтир çĕлемелли тата юсамалли, çĕçĕсем, çавасем çивĕчлетмелли, çăра уççисем тумалли пулăшу ĕçĕсен цехĕсем ĕçлеççĕ. Ача-пăча валли тум-юм, ура тăхăнмалли те кунтах тупса илме пулать. Çакăнтах ачасен "Тропики" кафетерийĕ пирожнăйсемпе, сĕткенсемпе сăйлать. Республикăри ытти райпосенчи пекех кунта та халăхран сĕт пуçтараççĕ, сивĕтмĕш витĕр кăларса Вăрнарти сĕт заводне кунне 17 тонна сĕт леçеççĕ. Халăхран пуçтарнă сĕте пĕрремĕш тата чи пысăк сортсемпе кăна заводсене ăсатаççĕ. Сĕт пахалăхне тĕрĕслеме "минилактант" текен аппаратура туяннă, лаборант сĕт пахалăхне вырăна тухса тĕрĕслет. Çавăн пекех халăхран аш-пăш, эмел курăкĕ, макулатура пуçтарассине те йĕркеленĕ. Райпон 63 лавккинче те хатĕрлев пункчĕсем ĕçлеççĕ. Журналистсем Отарккă ялĕнчи çăкăр заводне кĕрсе кунта туса кăларакан продукципе те паллашрĕç. Пысăках мар çăкăр заводĕнче пĕтĕмпе 14 çын тăрăшать, ĕçе виçĕ сменăпа йĕркеленĕ. Ирхине печени, рулет, кекс пĕçереççĕ, каçхине вара _ çăкăр, батон. Ялти "Куллен кирлĕ таварсем" лавкка ĕçне самообслуживани мелĕпе йĕркеленипе те кăсăкланчĕç массăллă информаци хатĕрĕсен ĕçченĕсем. Канашлăвăн иккĕмĕш пайĕнче ЧР информаци политикин министрĕ Валентина Андреева Чăвашпотребсоюз ĕçне пысăк хак пачĕ, кунта тăрăшакансем ял ĕçченĕсен социаллă саккасĕсене пурнăçланине палăртрĕ. Çавăн пекех министр райпо лавккисенче район хаçачĕсене сутассине йĕркелеме сĕнчĕ.
Г.НИКОЛАЕВА.