11 июня 2014 г.
Тĕлĕнмелле вăхăт - утă çи. Сад-пахчара та, уй-хирте те тĕрлĕ ỹсен-тăран ырă шăршă сарса ларать. Тин çеç çулса пăрахнă курăк хăйне май техĕмлĕ: сиплĕ сывлăшпа кăкăр туллин сывлас килет. Курăка çулнăçем, типĕтнĕçем чĕре савăнать, тăван çĕре юратни вара пĕтĕм вăя хурса ĕçлеме хал парса тăрать. Районти хуçалăхсенче халĕ хĕрỹ вăхăт _ хĕл кунĕсенче выльăхсем тутă пулччăр тесе апат хатĕрлеççĕ. Районĕпе июнĕн 9-мĕшĕ тĕлне нумай çул ỹсекен курăксене 800 гектар çулнă. Ку вăхăт тĕлне 270 тонна утă, 650 тонна сенаж янтланă. "Нива" хуçалăхра та ĕç ăнса пырать: нумай çул ỹсекен курăксене çулаççĕ, типĕтеççĕ, тĕркемлесе ферма çывăхне леçеççĕ. Çав хушăрах тĕме мелĕпе силос хываççĕ. Ку таранччен хуçалăх 10 тонна ытла утă, 300 тонна яхăн силос хатĕрленĕ, ĕçсем малалла пыраççĕ. Выльăх апачĕ хатĕрленĕ тапхăртах акнă пĕрчĕллĕ тата пăрçа йышши культурăсене хими мелĕпе çум курăкран тасатассине 3701 гектар, хими хỹтĕлевне 220 гектар çинче пурнăçланă.
А.ДМИТРИЕВА.