11 июня 2014 г.
11-мĕш класран вĕренсе тухакансем паян юлашки экзаменсем тытаççĕ пулсан, тăххăрмĕшсемшĕн экзаменсен тĕп тапхăрĕ иртнĕ эрнерех пĕтрĕ. Июнĕн 6-мĕшĕнче Хĕрлĕ Чутайри вăтам шкулта районти 155 ача вырăс чĕлхипе экзамен тытрĕ. 9-мĕш класс пĕтерекенсене 11-мĕшсене тĕрĕсленĕ пекех металл шыракан хатĕр витĕр кăлармарĕç, видеосăнав та пулмарĕ, çапах та вĕсен те яваплăха туйма тиврĕ. Вырăс чĕлхипе, тĕслĕхрен, ачасен изложени те, сочинени те çырмалла, ыйтусем çине хуравласа тĕрлĕ ĕç пурнăçламалла пулчĕ. Малалла кам ăçта кайма шут тытнине кура _ 10-мĕш класа е училище-техникум таврашне _ 9 класс пĕтерекенсем те математикăпа вырăс чĕлхисĕр пуçне хăйсем суйласа илнĕ предметсемпе экзаменсем тытрĕç. Хальхи вăхăтра 9-мĕш класс хыççăн шкултан тухса каякан ачасем ытларах пулнине палăртмалла. Чылайăшне тепĕр икĕ çултан патшалăх экзаменĕсене çирĕп йĕркепе тытмалли шухăша ярать пулинех. Тăххăрмĕшсем экзаменсен кăтартăвĕсене ултă кунран пĕлĕç. Июнĕн 10-19-мĕшĕсенче экзаменсен хушма тапхăрĕ пулĕ. Экзаменсен пĕтĕмлетĕвĕсемпе 9-мĕш класран вĕренсе тухакансем алла пĕтĕмĕшле пĕлỹ илни çинчен калакан аттестат илĕç.
А.КАРПОВА.