Публикации » Республикăра - тĕрлĕ шайри спорт ăмăртăвĕсем

11 июня 2014 г.

Юлашки вăхăтра республикăра тĕрлĕ шайри спорт ăмăртăвĕсем иртеççĕ. Июнĕн 5-7-мĕшĕсенче Шупашкарти Атăл кỹлмекĕн хĕрринче тата "Олимпийский" стадионта хăвăрт утас енĕпе Раççей чемпионачĕ тата первенстви иртнĕ. Унта 13 регионтан 170 ытла спортсмен хутшăннă. Тăватă тĕрлĕ ỹсĕм категорийĕнче медальсен 10 комплектне выляттарнă. Палăртмалла, 50 километра хăвăрт утса чăваш спортсменĕ Александр Яргунькин Раççей чемпионĕ ятне çĕнсе илнĕ. Июнĕн 5-мĕшĕнче Шупашкар районĕнче XVII Республикăри ялăн çуллахи спорт вăййисем уçăлнă, спортăн 13 тĕсĕнче хĕрỹ тупăшусем иртнĕ. Унсăр пуçне йăлана кĕнĕ йĕркепе доярсен, çавапа çулакансен тата механизаторсен хăвăртлăхĕпе çаврăнăçулăхне тĕрĕслес енĕпе ăмăртусем йĕркеленĕ. Ялăн çуллахи спорт вăййисенче Шупашкар районĕн команди çĕнтернĕ. Раççей кунне халалласа июнĕн 11-12-мĕшĕсенче Шупашкарти "Спартак" тата "Олимпийский" стадионсенче пирĕн çĕр-шыври пенсионерсен спартакиади иртет. Унта аслă ăрури 300 ытла спортсмен хутшăнĕ. Тивĕçлĕ канăва тухнисем спортăн пилĕк тĕсĕнче хăйсен хастарлăхне кăтартĕç. Ăмăрту "Спортпа туслашса вăрăм ĕмĕрлĕ пулас!" девизпа иртĕ.

А.ТИМОФЕЕВА.