Публикации » "Симĕс марафона" хутшăнчĕç

11 июня 2014 г.

Июнь уйăхĕн малтанхи кунĕсенче "Газпром" Шупашкарти газ валеçекен" УАО управленийĕпе районсенчи филиалĕсем пĕтĕм Раççейри "Симĕс марафон" экологи акцине хутшăнса муниципаллă территорисене пуçтарма тухнă. Районти газ участокĕнче тăрăшакансем те ĕçтешĕсенчен юлмарĕç, Хĕрлĕ Чутай салинчи Турă Хĕресне Çĕкленĕ Храм çумĕнчи пĕвене тасатрĕç. Унччен кунта пăрахса тултарнă тĕрлĕ ăпăр-тапăр çыран хĕррине пухăнса сăнсăррăн курăнса выртатчĕ. Халĕ вара _ таса та тирпейлĕ. Районти газ участокĕн ертỹçи Валерий Орлов пĕлтернĕ тăрăх, "кăвак çулăмпа" тивĕçтерекенсем пĕверен пурĕ 10 михĕ çỹп-çап кăларнă. Малашне асăннă пĕвере йăлари хытă каяшсем мар, хур-кăвакал кăна чăмпăлтатса ишсе çỹрессе шанас килет.

А.КАРПОВА.