21 июня 2014 г.
Чăваш кĕнеке издательстви шкул ачисем хушшинче "Чăваш кĕнеки. Пултаруллă çамрăксем" конкурс ирттерчĕ. Унта республикăри пур районтан та, унсăр пуçне Самарăран, Тутар Республикинчи Пăва тата Çарăмсан районĕсенчи ачасем те хутшăннă, пурĕ 365 ĕç тăратнă. Конкурсантсем тĕрлĕ номинацире _ кĕнеке тăрăх хаклав çырасси, ỹкересси, эссе, харпăр хăй тĕллĕн кĕнеке ăсталасси _ ăмăртрĕç. Çĕнтерỹçĕсене конкурса хутшăнакансен ỹсĕмне кура палăртрĕç. Кашни номинацире _ пĕрер çĕнтерỹçĕ, унсăр пуçне темиçе лауреат. Ачасен ертỹçисенчен чылайăшне Тав хучĕсем парса палăртрĕç. Июнĕн 17-мĕшĕнче Шупашкарти ача-пăча вулавăшĕнче çĕнтерỹçĕсен чыславĕ иртрĕ. Библиотека залне конкурса хутшăнакансен кĕнекисемпе тата ỹкерчĕкĕсемпе илемлетнĕ. Вĕсене пăхсан тĕлĕнмеллипех тĕлĕнетĕн: мĕн чухлĕ пулас ăста художник çитĕнет Чăваш Республикинче! Ĕçĕсем пĕри тепринчен хитререх! Харпăр хăй тĕллĕн хатĕрленĕ кĕнекесем те чуна илĕртеççĕ. Пирĕн районти Питĕркасси (ертỹçи Людмила Жукова), Хусанушкăнь (ертỹçи Светлана Яруткина) тата Штанаш (ертỹçисем Галина Зотова тата Марина Чучакова) шкулĕсен вĕренекенĕсем те ку конкурса хаваспах хутшăннă: хăйсем ăсталанă кĕнекесен тата çыравçă кĕнеки тăрăх ỹкерчĕк хатĕрленĕ. Штанаш шкулĕн вĕренекенĕсем Чăваш халăх сайчĕ ирттернĕ конкурсри хайлавсене тата "Тантăшра" пичетленнĕ материалсене пухса сакăр кĕнеке ăсталанă, пуçламăш класс ачисем ỹкерчĕксен конкурсне хутшăнма кăмăл тунă. Çĕнтерỹçĕсем хушшинче Штанаш шкулĕнче 5-мĕш класра вĕренекен Станислав Манин та пур. Вăл лауреат ятне тивĕçнĕ, ăна Диплом тата парнесем пачĕç. Конкурса хутшăннă кашни вĕренекен Чăваш кĕнеке издательствин Сертификатне илме тивĕçлĕ пулчĕ. Людмила Жуковапа Галина Зотована Чăваш кĕнеке издательстви Тав çырăвĕпе чысларĕ. Чыслав çỹллĕ шайра иртрĕ, пухăннисене Чăваш кĕнеке издательствин, "Тантăш" хаçатăн, вулавăш ĕçченĕсем саламларĕç. Ачасем библиотекăра экскурсире те пулчĕç, издательствăра тухнă çĕнĕ кĕнекесемпе паллашрĕç. Уява пухăннисене Никита Родионов çамрăк юрăç хăйĕн илемлĕ сассипе чуна тивекен чăваш юррисемпе савăнтарчĕ. Галина ЗОТОВА.