21 июня 2014 г.
Шăрăх çанталăкра чỹхенсе уçăлас текенсене "Хастар" ФСК-н бассейнĕ кĕтет Çулла - шыва кĕрсе савăнмалли вăхăт. Анчах та пурнăçшăн хăрушлăх ан тухтăр тесен ятарласа хатĕрлесе ирĕк панă вырăнсенче кăна шыва кĕме юрать. Июнĕн 17-мĕшĕнче райадминистрацинче Чăваш Республикин чрезвычайлă лару-тăрусен комитечĕн председателĕ Вениамин Петров, район администрацийĕн пуçлăхĕ Александр Башкиров, унăн пĕрремĕш çумĕ Алексей Порфирьев, ятарлă программăсен пай начальникĕ Валерий Жиганов, 33-мĕш номерлĕ пушар чаçĕн начальникĕ Александр Наумов хутшăннипе канашлу иртнĕ. Пухăннисем пушар хăрушсăрлăхĕ тата шыва кĕмелли тапхăр пирки калаçнă. Районти пушарсемпе çыхăннă лару-тăрăва илес пулсан, кăçал майăн 17-мĕшĕ тĕлне 21 пушар пулнине шута илнĕ, пĕлтĕр çак вăхăтра 14 пушар пулнă. Вут-çулăмра тăватă çын пурнăçĕ татăлнă. Пушарсен тĕп сăлтавĕсем - пирус туртни, вут-çулăмпа, электроприборсемпе усă курнă чух асăрханусăр пулни тата хăрушсăрлăх правилисене пăхăнманни, кăмакасемпе мăрьесем юсавсăр пулни. Паянхи кун çивĕч тăракан ыйтусенчен пĕри вăл _ шыва кĕмелли тапхăра инкексемсĕр ирттересси. Палăртмалла, районта шыва кĕме хатĕрленĕ ятарлă вырăнсем çук. Шăрăх çанталăкра чỹхенсе уçăлас текенсене "Хастар" ФСК-н бассейнĕ кĕтет. "Шыва кĕмелли тата пушар тухас хăрушлăх пысăк тапхăрсем инкексемсĕр иртчĕр тесен правилăсене пăхăнмалла, профилактика мероприятийĕсем ирттермелле", - тенĕ Александр Башкиров канашлăва пĕтĕмлетнĕ май.
А.ТИМОФЕЕВА.