21 июня 2014 г.
Нумай çул хушши тỹрĕ кăмăлпа ĕçленĕшĕн тата республикăн агропромышленность комплексне тỹпе хывнăшăн Н.Лисаев фермер хуçалăхĕн трактористне Юрий Тибогайкина, "Нива" ЯХПК трактористне Сергей Алжейкина тата Алексей Воронов тĕп агронома, "Коминтерн" ЯХПК водительне Олег Сапожникова тата Александр Мадайкин выльăх пăхакана Чăваш Республикин Ял хуçалăх министерствин Хисеп грамотине парса чысларĕç. Кăçалхи ака-суха ĕçĕсен, выльăх-чĕрлĕх пăхакансен тата ял хуçалăх таварĕсем туса илекенсен ăмăртăвĕсенче мала тухнисем район администрацийĕн Хисеп грамотисене тата укçа хавхалантарăвне тивĕçрĕç. Ял хуçалăх производство кооперативĕсемпе фермер хуçалăхĕсем хушшинче çурхи пĕрчĕллĕ культурăсене акас енĕпе чи малтан план тултарнăшăн тата калчасен шăтаслăхĕ аван пулнăшăн пĕрремĕш вырăна "Коминтерн" ЯХПК тата "Свобода" колхоз тивĕçрĕç, иккĕмĕш вырăна "Нива" ЯХПК-па Н.Лисаев фермер хуçалăхĕ тухрĕç. Районти механизаторсем хушшинче "Ĕç ăмăртăвĕн çĕнтерỹçи" ята "Коминтерн" хуçалăхри Юрий Татаров тата Николай Лаврентьев (урапаллă тракторпа ĕçленĕ), "Нива" хуçалăхри Владислав Алжейкин (гусеницăллă тракторпа тăрăшнă) тивĕçрĕç. Н.Лисаев фермер хуçалăхĕн тракторисчĕ Юрий Тибогайкин акара ĕçлесе мала тухнă. Выльăх-чĕрлĕх пăхакансен, сĕт фермисенче тăрăшакансен ĕç ăмăртăвĕнче "Коминтерн" хуçалăхри Галина Сергеева доярка, Мария Князевапа Елена Матвеева пăру пăхакансем, "Свобода" колхозри Галина Филиппова выльăх пăхакан, "Коминтерн" ЯХПК-ри Светлана Афанасьева, Альбина Мазикова, Ирина Сорокина сысна пăхакансем, "Нива" ЯХПК-ри Лидия Судеркина, "Свобода" колхоз зоотехникĕ Раиса Филиппова 2013 çулхи ĕç кăтартăвĕсемпе çĕнтерỹçĕ ятне тивĕçрĕç.
А.КАРПОВА.