21 июня 2014 г.
Июнĕн 12-мĕшĕнче иртнĕ Акатуйра "Чавал" уçланка спорта юратакансем те пухăнчĕç. Вĕсем тĕрлĕ енлĕ тупăшса хăйсен спортри пултарулăхне кăтартрĕç, ăмăртусенче вара чи вăйлисем палăрчĕç. Ирĕк-лĕ майпа кĕрешекенсен ăмăртăвĕ чылай куракана илĕртрĕ. Çивĕч кĕрешỹре тĕп парнене _ такана _ Хĕрлĕ Чутай салинчи Дмитрий Ульянов çĕнсе илчĕ. Палăртмалла, Дмитрий _ ирĕклĕ майпа кĕрешессипе Раççейĕн спорт мастерĕн кандидачĕ. Волейболла выляссипе хĕрарăмсем хушшинче Кив Атикасси, Мăн Этмен, Хĕрлĕ Чутай ял тăрăхĕсен командисем палăрчĕç. Арçынсем те волейболла хĕрỹллĕн вылярĕç, Мăн Этмен ял тăрăхĕн команди вара ыттисенчен ăсталăхĕпе палăрса такаллă пулчĕ. Кире пуканне çĕклессипе Ачкассинче çуралса ỹснĕ, хальхи вăхăтра ял хуçалăх академийĕнче вĕренекен спорт мастерне Дмитрий Козлова çитекенни пулмарĕ. Алă вăйне виçессипе Ишеккассинчи Евгений Васьков палăрчĕ. Шăчă çине улăхассипе Тумликассинчи Дмитрий Ямсков çĕнтерчĕ. "Автансен çапăçăвĕнче" Туканашри Алексей Михибиров палăрчĕ. Мечĕке урапа е пуçпа ывăтса "Хастар" ФСК тренерĕ Николай Судаков аванрах вылярĕ. Шахматла пуринчен те лайăхрах "Хастар" ФСК тренерĕ Евгений Сергеев выляни палăрчĕ. Турник çинче 24 хут туртăнса кăçал 11-мĕш класран вĕренсе тухакан Евгений Еремин (Ишеккасси) çĕнтерчĕ. Гимнастика ункине пуринчен те ытларах Ачкассинчи Елена Патьянова çавăрчĕ, унăн йăмăкĕ Анжелика Патьянова скакалкăпа аван сикрĕ. Ăмăртусенче мала тухнă спортсменсене укçа парса хавхалантарчĕç.
А.КАРПОВА.