Публикации » Республика чысне Хĕрлĕ Чутай шкулĕн каччисем хỹтĕлĕç

21 июня 2014 г.

Июнĕн 16-17-мĕшĕсенче Шупашкарта салтак çулне çитмен çамрăксен Спартакиадин республикăри тапхăрĕ иртнĕ. Виçĕ дисциплинăра вăй виçсе Хĕрлĕ Чутай шкулĕн ОБЖ предметне вĕрентекен Эдуард Романов ертсе пыракан çамрăксем çĕнтерỹçĕ ятне илме пултарнă. Çĕнтерỹçĕ-команда халĕ Раççей шайĕнче иртекен салтак çулне çитмен çамрăксен Спартакиадинче Чăваш Республикин чысне хỹтĕлеме хатĕрленет. Июнĕн 28-мĕшĕнчен пуçласа июлĕн 4-мĕшĕччен Рязань хулинче иртекен Спартакиадăна çĕр-шывăн 40 субъектĕнчи 500 яхăн яш хутшăнма палăртать. 1997-1999 çулсенче çуралнă спортсменсен çар эстафетинче, çар хатĕрленĕвĕнче, пейнтболра тупăшма тата вăй-хал аталанăвĕн смотрĕнче хăйсене лайăх енчен кăтартма тивĕ. Аса илтеретпĕр, пĕлтĕр Нижнекамск хулинче иртнĕ Спартакиадăн финалĕнче Хĕрлĕ Чутай шкулĕн салтак çулне çитмен çамрăкĕсем Раççей шайĕнче виççĕмĕш вырăна тухма пултарнăччĕ. Хĕрлĕчутайсене кăçал та çĕнтерỹпе таврăнма ăнăçу сунатпăр.

А.КАРПОВА.