25 июня 2014 г.
Федерацин Атăлçи округĕнчи çамрăксен "iВолга-2014" форумĕ вĕренỹ программисемпе пуян. Кăçал çак мероприятире республикăри 90 каччăпа хĕр хăйĕн проекчĕпе паллаштарĕ. Июнь уйăхĕн 18-28-мĕшĕсенче ку форум округăн пĕтĕм субъектĕнчи 2200 çамрăк валли презентаци лаптăкĕ пулса тăрĕ. Асăннă форум - федерацин Атăлçи округĕнчи çамрăксен политикин сферинчи çулсеренех йĕркелекен чи пĕлтерĕшлĕ пулăмсенчен пĕри. Вăл Раççей Президенчĕн хушăвĕпе килĕшỹллĕн пултаруллă хĕр упраçпа яш-кĕрĕмĕн инноваци идейисене пурнăçа кĕртмешкĕн пулăшас тĕллевпе иртет. Çамрăксен форумĕнче вунă кунра вĕренĕвĕн 8 смени ĕçлет: "Эсĕ - предприниматель", "Инновацисем тата техника пултарулăхĕ", "Информаци юхăмĕ", "Политика", "Ман хыççăн чуп", "АРТ Тăваткал", "Пĕчĕк Тăван çĕр-шыв - пысăк майсем", "Ырăлăх технологийĕ". Атăлçи çамрăкĕсемпе курнăçмашкăн тата ăсталăх класĕсем ирттермешкĕн форума паллă бизнесменсем, политиксем, журналистсем, патшалăх тата общество деятелĕсем килнĕ. Чăваш Ен делегацийĕ "Ворошилов стрелокĕ" ăмăртусене хутшăннă, хăшĕ-пĕри проекчĕсене хỹтĕлеме, экспертсен пулăшăвĕпе усă курма ĕлкĕрнĕ.
А.АЛЕКСЕЕВА.