Публикации » Чăвашлăха упраса

28 июня 2014 г.

Районта кашни эрнере тенĕ пекех туйсем кĕрлени савăнтарать. Çĕнĕ çемье çурални пурнăç малалла аталаннине пĕлтерет. Хальхи вăхăтра туйсене ытларах кафе-столовăй таврашĕнче ирттереççĕ. Кун пек ансатрах. Ĕлĕкхи йăла-йĕркепе сахалтан та виçĕ куна пыракан чăваш туйне йĕркелесе ирттерекенсем çукпа пĕрех халĕ. Çапах та тамада тытса столовăйсенче туй тунă хушăрах Чутай туйĕн йăли-йĕркине тăвакансем те пур. Акă иртнĕ эрнере Ишеккасси каччипе Александр Орловпа Туктамăш пики Светлана Яндрайкина хăйсен юратăвне çирĕплетсе çемье çавăрчĕç. Çамрăксен çывăх çыннисем, тăванĕсемпе тус-юлташĕсем туй кĕрекине пухăнса савăнчĕç, мăшăра телей сунчĕç. Вăхăт çитсен çĕнĕ çын шур пĕркенчĕк айĕнчен тухса пуçне масмак сырни, тĕрĕллĕ чăваш кĕпипе сурпан тăхăнни, илемлĕ саппунпа хĕрес çакки çакни пурин кăмăлне те кайрĕ. Туй арăмĕсем купăс кĕввипе чăвашла ташлани те, хăйматлăхсене çĕклени те çамрăк çемьен пĕрремĕш уявне сăн кĕртрĕ. Çамрăксене асатте-асаннесен йăли-йĕркине упрама аслисен вĕрентсе пымалла. Светланăпа Александр туйĕнче хĕрлĕчутайсен йăли-йĕркине туса ирттернинче çĕнĕ çынсен ашшĕ-амăшĕн тỹпи пысăк . Туйсене пĕтĕмпех чăвашла ирттермесен те ĕлĕкхи йăла-йĕрке саманчĕсене кĕртни питĕ аван.

А.КАРПОВА.