28 июня 2014 г.
Нумаях пулмасть Чăваш Ен Пуçлăхĕ Михаил Игнатьев республика Правительствин членĕсемпе, федерацин территори органĕсен тата хула округĕсен ертỹçисемпе канашлу ирттернĕ. Унта ЧР вĕренỹ министрĕ Владимир Иванов шкул пĕтерекенсем патшалăхăн пĕрлехи экзаменĕсене мĕнлерех тытнипе паллаштарнă. Министр палăртнă тăрăх, экзаменсене çамрăксен ытларах пайĕ ăнăçлă тытнă, анчах тивĕçлĕ мерăсем йышăннă пулин те экзамен тытакансем, йĕркелỹçĕсем йĕркене пăснă тĕслĕхсем пулнă. Ку енĕпе уйрăмах Патăрьел районĕ "палăрнă". Чăваш Ен Пуçлăхĕн шухăшĕпе, республикăра шкул пĕтерекенсем экзаменсенче çуллен лайăх кăтартусемпе палăраççĕ, анчах ыйтусем пур. "Экзаменсен йĕркелỹ шайне ỹстермелле, должноçри çынсен яваплăхне çирĕплетмелле", _ тенĕ Михаил Игнатьев. Кăçал ППЭ ирттермелли йĕрке чылай çирĕпленнĕрен-ши, вырăс чĕлхипе тата математикăпа аттестатлă пулма чи сахал пухмалли балсене юлашки кунсенче пĕчĕклетсе лартрĕç. Анчах та Рособрнадзор çакна асăрхаттарать: аслă вĕренỹ заведенийĕсене вĕренме кĕрекенсем валли чи пĕчĕк балсене пĕлтĕрхисенех хăварнă - математикăпа 24 балл, вырăс чĕлхипе -36. Райадминистрацин вĕренỹ пайĕ пĕлтернĕ тăрăх, пĕрлехи патшалăх экзаменĕсен районти малтанхи пĕтĕмлетĕвĕсем çапларах: Вырăс чĕлхипе 107 ача экзамен тытнă, вăтам кăтарту - 61,92 (пĕлтĕр 64,36 пулнă). Республикăри вăтам балл - 65,31. Математикăпа 107 ача тĕрĕслев витĕр тухнă, вăтам балл - 39,8 (пĕлтĕр - 49,93). Республикăри вăтам балл - 46,79. Физикăпа 19 ача экзамен тытнă, вăтам балл - 42,5, пĕлтĕр 53,9 балл пулнă. Республикăри кăтарту - 48,12. Литературăпа вăтам балл - 60, республикăра - 57,75, географипе - 62, республикăра - 62,09. Информатикăпа районта тăваттăн экзамен тытнă, вăтам кăтарту - 44 балл (пĕлтĕр те 44 пулнă). Республикăра - 59,06 балл. Биологипе 31 ача тытнă, вăтам балл - 51,7 (пĕлтĕр 49,7 балл пулнă). Республикăра - 57,7. Историпе 18 ача вăтамран 44,4 баллăх тытнă, пĕлтĕрхи кăтарту - 48,7. Химипе 12 ача вăтамран 59,9 баллăх тытнă, пĕлтĕр 69,5 пулнă. Республикăра - 60,5 балл. Обществознанипе 67 ача вăтамран 47,7 баллăх тытнă, пĕлтĕрхи кăтарту - 58,6. Республикăра - 55,39 балл. Куратпăр ĕнтĕ, чылай предметпа вăтам балсем пĕлтĕрхинчен пĕчĕкрех. Республикăри шкулсенче сыв пуллашу каçĕсем иртнипе пĕрлех вăтам тата аслă професси пĕлĕвĕ паракан учрежденисенче йышăну кампанийĕ пуçланнă. Вăтам професси пĕлĕвĕпе тивĕçтерекеннисем абитуриентсем валли 8 пин ытла бюджет вырăнĕ хатĕрленĕ, аслă вĕренỹ заведенийĕсем 3,5 пин çамрăка тỹлевсĕр йышăнĕç. Математикăпа, физикăпа ППЭ-ре 70 балл е унран та ытларах пухнисене пĕлме: Чăваш Енре вырнаçнă аслă пĕлỹ паракан заведение вĕренме кĕрсен сире малтанхи çул ЧР Пуçлăхĕн хушма стипендийĕпе тивĕçтерĕç. Унăн калăпăшĕ уйăхне икĕ пин тенкĕпе танлашать.
А.ТИМОФЕЕВА.