02 июля 2014 г.
Июнĕн 27-мĕшĕнче Самар облаçĕнче иртнĕ федерацин Атăлçи округĕнчи "iВолга-2014" форумăн çĕнтерỹçисене палăртнă. Мероприятие савăнăçлă лару-тăрура хупнă çĕре РФ Патшалăх Думин депутачĕ тата Олимп чемпионки Светлана Журова, РФ Патшалăх Думин депутачĕсем Владимир Плигин тата Франц Клинцевич, Раççейĕн Обществăлла палатин членĕ Сергей Марков, Совет Союзĕн Геройĕ Владимир Чудайкин çитнĕ. Чи лайăх проектсене Раççей Президенчĕн федерацин Атăлçи округĕнчи полномочиллĕ представителĕ Михаил Бабич хакланă. Вăл йыхравланипе форума 2000 ытла çамрăк хутшăннă, Китай Халăх Республикинчен - 150 студент. Кăçал икĕ çĕр-шыв çамрăкĕсем - Раççейпе Китай студенчĕсем - конкурса пĕрле хатĕрленĕ ĕçсене тăратнă, вĕсен вĕренỹ программи виçĕ чĕлхепе (вырăс, китай, акăлчан) пынă. Самар облаçĕн кĕпĕрнаттăр тивĕçĕсене пурнăçлакан Николай Меркушкин палăртнă тăрăх, форума Китай делегацийĕ хутшăнни конкурс кăтартăвне самай пуянлатма пулăшнă. Пĕтĕмпе конкурса 1622 проект тăратнă. Федераллă тапхăра 326 проект тухнă. 150 тата 300 пин тенкĕпе танлашакан грантсене 40 çĕнтерỹçĕ тивĕçнĕ, вĕсен йышĕнче - Чăваш Ен çамрăкĕсем те. Çамрăксен форумĕн пĕтĕмĕшле приз фончĕ 8 млн тенкĕ пулнă. Пĕлтĕрхи пекех конкурса хутшăннă 16 çамрăк Байконур космодромне кайма путевка илнĕ. Виçĕ студент Китай Халăх Республикине кайса курĕ.
РФ Президенчĕн полномочиллĕ представителĕн пресс-служби.