Публикации » Библиотека ĕçне аталантарма тỹпе хывнăшăн

05 июля 2014 г.

Нумай çул хушши тухăçлă ĕçленĕшĕн тата библиотека ĕçне аталантарма пысăк тỹпе хывнăшăн районти тĕп библиотекăра тăрăшакан Валентина Падюкована Акатуйра Чăваш Республикин Культура министерствин Хисеп грамотине парса чысларĕç. Валентина Александровна районти тĕп библиотекăн ача-пăча уйрăмĕнче 1981 çултанпа ĕçлет. Хăйĕн ĕçне тăрăшса пурнăçлать, кĕнеке вулама пынă ачасемпе пĕр чĕлхе тупма пĕлет. Пĕчĕк вулакансем библиотекăна ытларах килччĕр тесе Хĕрлĕ Чутайри ача сачĕсемпе çыхăну тытсах тăрать. Тăтăшах тĕрлĕ кĕнеке куравĕсемпе стендсем йĕркелет, массăллă мероприятисене те хутшăнать. Пĕлĕвне ỹстерес тесе библиотекарь тĕрлĕ курссенче пулать, семинарсене те час-часах хутшăнать. Ăнăçлă ĕçлесе пынăшăн Валентина Падюкована район администрацийĕн тата культура пайĕн Хисеп грамотисемпе те наградăланă. Ĕçтешĕсен Тав çырăвĕсене те вăл пĕрре кăна мар тивĕçнĕ.

А.КАРПОВА.