05 июля 2014 г.
.jpg "Районăн хисеплĕ гражданинĕ")
Июнĕн 12-мĕшĕнче иртнĕ Акатуйра Хĕрлĕ Чутай салинче çуралса ỹснĕ Александр Иваницкие "Районăн хисеплĕ гражданинĕ" ят парса чысларĕç. Ку ята район умĕнче ырă ĕçсемпе уйрăмах палăрнă çынсене параççĕ. Александр Иваницкий - Чăваш патшалăх университечĕн ĕçлевлĕх математикин факультечĕн деканĕ, актуарлă тата финанс математикин кафедрин заведующийĕ. Университетра 35 çул ытла ĕçленĕ хушăра 1500 ытла студент вĕрентсе кăларнă, 60 наукăпа методика ĕçĕ çырса хатĕрленĕ. Александр Юрьевич ĕçĕсем Раççейре тата ют çĕр-шывсенче пичетленнĕ. Ют çĕр-шывсем тенĕрен, пирĕн ентеш унта ик çĕр хут ытла пулнă. МГУ-н аспирантуринчен вĕренсе тухнăскер хăй вăхăтĕнче АПШ-ри Огайо штатĕнчи университетра ятарлă курссенче вĕреннĕ. Америка тăрăх тăлмачă илсе çỹрес мар тесе акăлчан чĕлхине вĕреннĕ, халĕ ĕçлĕ калаçусене хăех ирттерет. Александр Иваницкий йĕркеленĕ фирма ют çĕр-шыва тавар сутакан Раççейри ертсе пыракан пилĕк фирма шутне кĕрет. Çак ĕç республикăна пысăк усă кỹрет - ют çĕр-шывран пирĕн пата укçа кĕрет. Ĕçлесе илнĕ укçаран Александр Юрьевич ĕçтешĕсене кĕнеке кăларма пулăшать, пуян мар çемьесенчи ăслă-тăнлă студентсене стипенди парса тăрать. Хăй вăхăтĕнче Александр Иваницкий "Раççей Федерацийĕн аслă шкулĕн тава тивĕçлĕ ĕçченĕ", "Чăваш Республикин тава тивĕçлĕ вĕренỹ ĕçченĕ" хисеплĕ ятсене, РФ Вĕренỹпе наука министерствин Хисеп грамотине тивĕçнĕ. Наукăпа вĕренỹри çитĕнỹсемпе пĕрлех вăл спортпа туслашма та вăхăт тупать - пысăк теннис енĕпе тĕрлĕ ăмăртусене те хутшăнать. Çавăн пекех Александр Юрьевич акăлчан чĕлхиллĕ рок-музыкăпа та кăсăкланать теççĕ.
А.КАРПОВА.