05 июля 2014 г.
"Красная звезда" хаçатăн ятарлă корреспонденчĕ Олег Грозный нумаях пулмасть Чăваш Ене килнĕ. Унпа пĕрле тăван тăрăхра Мускаври офицерсен "Сыны Отечества" ентешлĕхĕн членĕсем Александр Зиновьев генерал-майор, Иван Николаев полковник хăнара пулнă. Сумлă хăнасене ЧР информаци политикин тата массăллă коммуникацисен министрĕ Валентина Андреева кĕтсе илнĕ, республикăра çамрăксене çарпа патриотлăх воспитанийĕ парасси мĕнле пурнăçланнипе паллаштарнă. Чăваш Ен - "Зарница" тата "Орленок" вăййисене ирттерессине çирĕп пăхăнакан, 45 çул ăна пĕр сиктермесĕр йĕркелекен Раççейри регионсенчен пĕри. Çак вăхăтра вăйăсем нумай хĕрпе каччăшăн чăн-чăн патриотлăх шкулĕ пулса тăнă, професси суйласа илме пулăшнă, пĕр-пĕрин хушшинчи туслăха çирĕплетнĕ. Чăваш Ен çамрăкĕсем тĕрлĕ вăййа хутшăнаççĕ, малти вырăнсене йышăнаççĕ. Сăмахран, федерацин Атăлçи округĕнче йĕркелекен "Туриада", "Гвардеец" спортпа туризм лагерĕсенче, "Зарница" çарпа спорт вăййисенче. Мускав хулинчен килсе çитнĕ делегаци Шупашкар хулин кадет шкулĕнче вĕренекенĕсемпе тĕл пулнă, Муркаш районĕнчи Исетерккĕ ялĕнчи Т.Н.Николаева ача амăшĕ-героиня (8 ывăл çитĕнтерсе вăрçа ăсатнă, вĕсенчен улттăшĕн пурнăçне вăрçă татнă) палăкĕ умне чечексем хунă. Аслă Отечественнăй вăрçă паттăрĕн Николай Афанасьевăн тăван ялне, Тăвай районĕнчи Кармала, çитнĕ. Хăнасем А.Г.Николаев космонавт летчик мемориал комплексĕпе, В.И.Чапаев музейĕпе паллашнă. Палăртса хăвармалла, Раççейри "Красная звезда" тĕп çар хаçачĕ 2013 çулта хăйĕн 90 çулхи юбилейне паллă тунă. Унăн пĕрремĕш номерĕ 1924 çулхи январĕн 1-мĕшĕнче пичетленсе тухнă. Редколлеги членĕсем палăртнă куна, 1923 çулхи декабрĕн 4-мĕшне, хаçатăн çуралнă кунĕ тесе паллă тăваççĕ. 1992 çулта РФ Оборона министерствине туса хунăранпа "Красная звезда" хаçат унăн тĕп пичет кăларăмĕ пулса тăнă. Мускаври офицерсен "Сыны Отечества" ентешлĕхĕн членĕсем - Чăваш Енре çуралсă ỹснĕ, халĕ Мускав хулинче пурăнакан çар çыннисем. Вĕсем хушшинче - çар ĕçĕн ветеранĕсем, офицерсем, çар училищисен курсанчĕсем, салтаксем... Вĕсем çамрăксем хушшинче çарпа патриотлăх воспитанине сарас, ăна аталантарас тĕлĕшпе тĕп хулара çеç мар, çуралса ỹснĕ тăрăхра та нумай ĕçлеççĕ.
Н.ИВАНОВА.