05 июля 2014 г.
Ĕнер Хĕрлĕ Чутай шкулĕн салтак çулне çитмен çамрăкĕсем Рязань хулинче июнĕн 28-мĕшĕнчен пуçласа июлĕн 3-мĕшĕччен иртнĕ Спартакиадăран таврăнчĕç. Эрнене яхăн пынă ăмăртусенче каччăсен çар хатĕрленĕвне кăтартма, эстафетăра тупăшма, пейнтболла выляма, чупма, сикме, ишме, граната ывăтма, турник çинче туртăнма тивнĕ. Раççей шайĕнче иртнĕ Спартакиадăра Чăваш Республикин чысне хỹтĕленĕ Хĕрлĕ Чутай шкулĕн команди çĕр-шывăн 39 регионĕнчен килнĕ командăсем хушшинче 4-мĕш вырăна тухма пултарнă. Тăваттăмĕш вырăн чи кỹренмелли теççĕ те, анчах та Эдуард Романов педагог йĕркелесе-ертсе пыракан яшсем пирки "маттурсем" тесе çеç калас килет. Спартакиадăна хутшăннă 10 çамрăкран çиччĕшĕ - Алексей Дадюков, Стас Михопаркин, Юрий Степанов, Иван Пименов, Константин Секайкин, Юрий Яндайкин - кадетсем, кăçал 8-мĕш класс пĕтерчĕç, вĕсенчен виççĕшĕ 15 çул та тултарман. Артем Романов, Кирилл Андрианов тата Дмитрий Афанасьев 9-мĕш класран вĕренсе тухрĕç, Денис Триковский - 10-мĕшĕнчен. Тĕрĕссипе, вĕсене пĕр сăмахсăр пĕрремĕш вырăн памалла! Ытти регионсенчен Спартакиадăна килнĕ командăсенчен чи çамрăккисем пулнипе пĕрлех пирĕн яшсен тĕрлĕ шкулсенчен, кадет корпусĕсенчен, спорт клубĕсенчен пухса хатĕрленĕ пĕрлештернĕ командăсемпе вăй виçме тивнĕ. Апла пулин те, ял ачисем вĕсем хушшинче çухалса кайман, хăйсене лайăх енчен çеç кăтартма пултарнă. Кăçалхи Спартакиадăна хутшăнса пухнă паха пĕлỹ-хăнăху Хĕрлĕ Чутай шкулĕн салтак çулне çитмен çамрăкĕсене çитес çулхи ăмăртусене хутшăнса çĕнтерỹçĕ ятне илме пулăшасса шанатпăр.
А.КАРПОВА.