Публикации » 94 çул çитнĕ май

09 июля 2014 г.

1920 çулхи июлĕн 6-мĕшĕнче Чăваш облаçĕн милицине йĕркелесси çинчен Чăваш автономи облаçĕн Правительствин хушăвне алă пуснă. Унтанпа 94 çул çитнĕ ĕнтĕ. Çак кунсенче районти полици уйрăмĕн начальникĕ, полици майорĕ А.Н.Михопаркин шалти ĕçсен органĕсен сотрудникĕсемпе ветеранĕсене асăннă уяв ячĕпе саламланă. Александр Николаевич полици ĕçченĕсем питĕ кирлĕ професси çыннисем шутланнине çирĕплетнĕ. Çавăн пекех вăл шалти ĕçсен сотрудникĕсем хăйсен çывăх çыннисемпе тăванĕсем вĕсемпе мăнаçланнине туйса тăрасса шаннине пĕлтернĕ, кашни ĕçчене обществăн тата патшалăхăн право йĕркине тивĕçтерес енĕпе шанчăклă тĕрекĕ пулма суннă. Ырă йăлапа килĕшỹллĕн уяв ячĕпе саламланă май йĕрке хуралĕн лайăх енчен палăрнă ĕçченĕсене - участок уполномоченнăйĕсен аслă инспекторне, полици майорне И.Н.Серина, кинолога, полици старшинине А.Г.Краснова тата шалти ĕçсен органĕсен ветеранĕсене В.В.Горшковпа В.В.Жукова - хисеп хучĕсемпе чысланă. Мероприяти полици ĕçченĕсемпе шалти ĕçсен органĕсен ветеранĕсем хăйсен тивĕçне пурнăçланă чух вилнĕ сотрудниксене асăнса лартнă палăк умне чечек çыххисем хунипе вĕçленнĕ.

Н.МИДАКОВА.