14 июля 2014 г.
Юлашки вăхăтра пĕчĕк ачасем чỹречерен тухса ỹкнĕ тĕслĕхсем нумайланчĕç. Районти пĕр ăнăçлă çемьере амăшĕ ирхине хăйĕн пахчине ĕçлеме тухнă. Икĕ çулхи ачи пỹртре çывăрнă. Амăшĕ темиçе хутчен те пỹрте кĕрсе пăхнă _ ачи çаплах çывăрнă. Тем вăхăтран хĕрарăм çурт умĕнчи картана ĕçлеме куçнă та уçă чỹречен москитлă сетки хыçĕнче ывăлĕ тăнине курнă. Амăшĕ пỹрте чупса кĕнĕ, анчах та ачи чỹречере пулман та ĕнтĕ _ вăл иккĕмĕш хутри чỹречерен тухса ỹкнĕ... Тепĕр пăтăрмахĕ çак кунсенче пулса иртнĕ. Амăшĕ хăйĕн ĕçĕсемпе кайнă, икĕ çулти хĕр ачине асламăшĕпе хăварнă. Хăйне япăхрах туйнăран ватă хĕрарăм диван çине выртнă. Икĕ çулхи мăнукĕ пилĕк çулхи аппăшĕпе иккĕмĕш хутри пỹлĕмре пулнă. Тем вăхăтран асламăшĕ иккĕмĕш хутран темĕн ỹкнине асăрханă. Урамран ача макăрнă сас илтĕннĕ. Кайран çакă палăрнă _ иккĕмĕш хутри чỹрече кăшт уçă пулнă иккен... Юрать-ха, икĕ тĕслĕхĕнче те ачасем сывă юлнă. Пĕчĕк ачасем лара-тăра пĕлмеççĕ, вĕсен пĕтĕмпех пĕлес, курас килет. Çавăнпа та шăпăрлансене пăхакан ашшĕ-амăшне, аслашшĕ-асламăшне питĕ асăрхануллă пулма чĕнсе калас килет. Пĕчĕккисене тимлĕхсĕр ан хăварăр! Çакă пысăк инкекпе вĕçленме пултарать. Çакна та палăртса хăвармалла: ачасене пăхма тивĕç аслисене пĕчĕккисене вĕсен сывлăхĕшĕн хăрушлăх кăларса тăратакан лару-тăрура хăварнăшăн, хăйсене упрама майсем туса паманшăн саккун умĕнче явап тыттарма пултараççĕ. РФ Уголовлă кодексĕн 125 статйипе çакăншăн 80 пин тенкĕ штраф пама е çулталăка яхăн ирĕксĕр хăварма пултараççĕ.
Н.КРАСНОВА, районти полици уйрăмĕн çул çитменнисемпе ĕçлекен инспекторĕ.