16 июля 2014 г.
Тăван тăрăх аталанăвне тỹпе хывнă çынсем районта сахал мар. Акă хĕрлĕчутайсем хушшинче Николай Филиппович Яхатина пĕлмен çын сахалрах пулĕ. Вăл хăй вăхăтĕнче тĕрлĕ должноçсенче вăй хунă, района аталантарас тесе тимленĕ. Николай Филиппович çак кунсенче хăйĕн 70 çулхи юбилейне паллă турĕ. Н.Ф.Яхатин Çĕн Ирчемес ялĕнче 1944 çулхи июлĕн 15-мĕшĕнче кун çути курнă. Чи малтанах вăл Уйпуçĕнчи 7 çул вĕренмелли шкула пĕтернĕ, унтан Мăн Этменти вăтам шкултан вĕренсе тухнă. Николай Филиппович Чулхулари партин аслă шкулĕнче те ăс пухнă. Çавăн пекех ку хулари автотранспорт техникумĕнче пĕлĕвне тарăнлатнă, техник-экономист специальноçне алла илнĕ. Ĕç кĕнеки вара унăн 14 çулта чухнех Чапаев ячĕллĕ тăван колхозра çырăнма тытăннă. Совет çарĕнчен салтак тивĕçне пурнăçласа таврăннă хыççăн Н.Ф.Яхатин вунă çул хушши районти "Сельхозтехника" пĕрлешĕвĕнче тĕрлĕ должноçсенче тăрăшнă. 1978 çулта ăна Хĕрлĕ Чутайри МПМК начальникĕ пулма шаннă. Ку тивĕçе вăл 11 çул пурнăçланă. 1989 çулта Николай Филиппович райканашĕн ĕçтăвком председателĕн çумĕнче ĕçленĕ. 1990 çулта вара вăл "Колос" колхоз председателĕнче вăй хума тытăннă. 1997 çулта Н.Ф.Яхатин район администрацийĕн пуçлăхĕн çумĕ пулнă, тепĕр çулхине вара ăна МТС директорĕн тивĕçне шанса панă. Николай Филиппович район пурнăçне хастар хутшăнать, ветерансен юхăмĕнче те активлăх кăтартать, çамрăксене патриот воспитанине парассине те малти вырăна хурать. 2012 çулхи сентябрĕн 28-мĕшĕнчен пуçласа вăл АПК ветеранĕсен пĕрлешĕвĕн председателĕ шутланать. Н.Ф.Яхатинăн наградăсем те сахал мар. Ĕçлĕх Хĕрлĕ Ялав орденĕ, "1941-1945 çулсенчи Тăван çĕр-шывăн аслă вăрçинчи Çĕнтерỹ 20 çул тултарни" юбилей медалĕ, "Ĕç ветеранĕ" медаль, Чăваш АССР-ĕн Аслă Канашĕн Президиумĕн, ЧАССР Министрсен Канашĕн тата ытти Хисеп грамотисем, 2001 çулта тивĕçнĕ "Чăваш Республикин тава тивĕçлĕ ял хуçалăх ĕçченĕ" хисеплĕ ят Николай Филипповичăн ĕçне пысăк хаклав панине çирĕплетеççĕ.
Н.ИВАНОВА.