16 июля 2014 г.
Июлĕн 11-мĕшĕнче Чăваш Республикин Пуçлăхĕ Михаил Игнатьев Оренбург хулинче иртнĕ "Атăлçи уй кунĕ - 2014" мероприятие хутшăннă. Республика Пуçлăхĕ федерацин Атăлçи округĕн регионĕсенче туса кăларакан ял хуçалăх техникисен тата хатĕрĕсен, выльăх-чĕрлĕх тытăмĕнчи çитĕнỹсен, тĕрлĕ йышши апат-çимĕç таварĕсен куравĕнче пулнă. Унта Шупашкарти "Трактор завочĕсем" концерн туса кăларакан "Агромаш" маркăллă ял хуçалăх техникин тĕслĕхĕсене, Чăваш Республикин аграри отраслĕн предприятийĕсен таса продукцине тăратнă. Программăпа килĕшỹллĕн "Федерацин Атăлçи округĕнче агропромышленность комплексне аталантарасси" темăпа канашлу иртнĕ. Раççей Президенчĕн федерацин Атăлçи округĕнчи полномочиллĕ представителĕ Михаил Бабич юлашки вăхăтра ял сăнĕ самай улшăннине палăртнă: ял хуçалăх отраслĕ çĕнĕ техникăпа тата хальхи йышши технологисемпе пуянланса пырать, ял тăрăхĕсен социаллă инфратытăмĕ лайăхланать. Анчах та ял хуçалăх организацийĕсем кредит нумай илсе тултарни чăрмав кỹрет. Раççей ял хуçалăх министрĕ Николай Федоров пĕлтернĕ тăрăх хресченсене пулăшма уйăрнă укçа-тенкĕ регионсене тулли калăпăшпа çитмен. Çавăн пекех кăçал аш-какай импорчĕ те 32 процент чакнă. Михаил Игнатьев республикăра ял хуçалăх организацийĕсем, фермер тата уйрăм хуçалăхсем вăй илсе пынине палăртнă: пур категорири хуçалăхсенче 2014 çулхи январь-май уйăхĕсенче ял хуçалăх продукцине туса илесси 0,2 процент ỹснĕ, 7,3 млрд тенкĕпе танлашнă. 2014 çулхи июнĕн 30-мĕшĕ тĕлне республикăри ял хуçалăх таварĕсем туса илекен предприятисене тата агропромышленность комплексĕн организацийĕсене 1 млрд ытла тенкĕ субсиди куçнă. Планпа пăхса тухнипе унăн виçи 2,1 млрд тенкĕ пулмалла, вăл шутра федераллă бюджетран - 705,6 млн тенкĕ. Июлĕн 12-мĕшĕнче вара республика Пуçлăхĕ асăннă хулари "Наци ялĕ" культура комплексĕнчи чăвашсен кил картишĕнче пулса курнă. Хăйне евĕрлĕ музей уçă, витмен çĕрте вырнаçнă. Михаил Игнатьев кунти этнографи музейне, литература библиотекине çитнĕ, чăваш халăх культурипе, экспозицисемпе паллашнă. Асăнмалла, "Наци ялĕ" комплекс пĕтĕмпе 10 наци кил картишĕнчен тăрать. Вăл Оренбург хулин Гагарин проспектĕнче вырнаçнă.
ЧР ПА пресс-служби.