16 июля 2014 г.
Шăмат кун, июлĕн 12-мĕшĕнче, районти потребительсен обществинче тăрăшакансем хăйсен професси уявне паллă турĕç. Хĕрлĕ Чутай салин Çĕнтерỹ лапамне каçхи çичĕ сехет тĕлне халăх чылай пухăнчĕ. Пĕрисем хамăр патра тата Етĕрнере, "Акконд" фирмăра туса кăларакан апат-çимĕçпе тĕрлĕ сĕткен, сĕт продукцийĕ, канфет-пĕремĕк сĕнекен куравра техĕмлĕ çимĕçсемпе сăйланчĕç, теприсем концерт курчĕç. Ачасем пĕр хушă ташласа савăнчĕç, унтан райпо ĕçченĕсем валеçнĕ мороженăй тутанчĕç. Çав хушăрах кăçалхи июлĕн 1-11-мĕшĕсенче гастрономпа универмагра пĕр пин ытла тенкĕлĕх тавар туяннисем хушшинче лотерея вылявĕ те иртрĕ. Хаклă парнесем выляса илчĕç уява пынисем, чи пысăк парне - микрохумлă кăмака - Хĕрлĕ Чутай салинчи Оксана Ефремована тухрĕ. Уява пухăннисене ЧР Патшалăх Канашĕн депутачĕ, Чăвашпотребсоюз Канашĕн председателĕ Валерий Павлов, район пуçлăхĕ, райпо Канашĕн председателĕ Александр Степанов, район администрацийĕн пуçлăхĕ Александр Башкиров, "Россельхозбанкăн" районти уйрăмĕн управляющийĕ Николай Огаринов, Хĕрлĕ Чутайри Турă Хĕресне Çĕкленĕ храмăн настоятелĕ Максим атте саламларĕç, районăн экономика аталанăвĕнче райпо пĕлтерĕшĕ пысăк пулнине палăртрĕç. Сăмах май, Валерий Павлов депутат райпо кунĕнче çулсеренех районти çамрăк мăшăрсене парнепе чыслать. Кăçал та ку йăлана пăрахăçламарĕç. Шăп çак кун çемье çавăракан çамрăк мăшăра - Хĕрлĕ Чутай салинчи Марина Орловапа Урикассинчи Сергей Степанова - уява пухăннă халăх умĕнче саламларĕç. Çамрăк çемьене "çĕнĕ кайăк" вĕçсе кĕрсенех Валерий Михайлович вĕсене ача кỹми парнелеме пулчĕ. Райпо кунне чăваш эстрада çăлтăрĕсен концерчĕпе каçхи тỹпене пин-пин çутăпа йăлкăштарнă фейерверк илемлетрĕç. Уяври савăнăçлă пулăмсенчен пĕри райпо тытăмĕнче тăрăшакансене тĕрлĕ наградăсем парса чыслани пулчĕ: РФ Центросоюз Канашĕн Президиумĕн йышăнăвĕпе "Раççей Федерацийĕн потребкооперацийĕнче тỹрĕ кăмăлпа ĕçленĕшĕн" паллăна Ольга Морозова экономист, Светлана Манилова сутуçă, Надежда Миронова йышăнакан, Любовь Максейкина повар тивĕçрĕç. "Потребкооперацире 40 çул тивĕçлĕ ĕçленĕшĕн" хисеплĕ паллăна склад заведующийĕ Галина Макарова тивĕçрĕ, "Потребкооперацире 30 çул тивĕçлĕ ĕçленĕшĕн" хисеплĕ паллăна - Ольга Волкова поварпа Альбина Архипова кассир, "Потребкооперацире 25 çул тивĕçлĕ ĕçленĕшĕн" паллăна - Юлия Глухова рабочи, "Потребкооперацире 20 çул тивĕçлĕ ĕçленĕшĕн" паллăна - çăкăр завочĕн тĕп бухгалтерĕ Елена Палейкина. Галина Яркина тĕп экономист РФ Центросоюзĕн Хисеп Грамотине тивĕçрĕ. Надежда Соколова ЧР Спорт министерствин, Валентина Патьянова ЧР Ял хуçалăх министерствин Хисеп грамотине тивĕçрĕç. Валерий Михеев водителе тата Елена Акальская аслă бухгалтера "Раççей Федерацийĕн потребкооперацийĕн ветеранĕ" хисеплĕ ят панă. Кооперативсен пĕтĕм тĕнчери кунĕ ячĕпе тĕрлĕ наградăсемпе хисеп хучĕсене тивĕçнисем: Алиса Сухарева повар - "Раççей кооператив юхăмĕн çамрăк лидерĕ" паллă; Ирина Удякова кондитер, Марина Смирновапа Галина Федорова лавкка заведующийĕсем - Чăвашпотребсоюзăн Хисеп грамотисем; Галина Кондрашкина лавкка заведующийĕ - Чăвашпотребсоюзăн Тав сăмахĕ; Вера Куличева лавкка заведующийĕн сăнне Чăвашпотребсоюзăн Хисеп хăми çине вырнаçтарнă.
А.КАРПОВА.