21 июля 2014 г.
Вăрçă ветеранĕсене, тылра вăй хунисене 90 тата ун хыççăнхи юбилейсем ячĕпе Раççей Президенчĕн Çырăвĕпе саламласси ырă йăлана кĕчĕ. Акă июлĕн 15-мĕшĕнче районта пурăнакан виçĕ кинемей хăйсен 90 çулхи юбилейĕсене кĕтсе илнĕ. Ачкасси ялĕнче пурăнакан Вера Андреевна Герасимова патне Мускавран çитнĕ саламлă Çырăва район администрацийĕн пуçлăхĕ Александр Башкиров, Ачкасси ял тăрăхĕн администрацийĕн специалисчĕ Ирина Макарова çитернĕ, ватăна унти ăшă сăмахсемпе паллаштарнă, ырлăх-сывлăх суннă. Самаях вăрçă нушине тутаннă хĕрарăм 41 çул ĕнтĕ кинĕпе пурăнать. Кив Атикассинчи Любовь Алексеевна Сергеевапа Кĕрлев ялĕнчи Клавдия Петровна Исаева та çак кун сумлă юбилейĕсене паллă тунă. Хисеплĕ ватăсем патне саламлă Çырусемпе район администрацийĕн пуçлăхĕн çумĕ Алина Ярабаева, социаллă хỹтлĕх пайĕн тĕп эксперт специалисчĕ Валентина Казакова, Кив Атикассипе Штанаш ял тăрăхĕсен представителĕсем çитнĕ, ĕç фронтне хастар хутшăннă ветерансене канлĕ ватлăх суннă. Ĕмĕр тăршшĕпе колхозра ĕçленĕ Любовь Алексеевнан кун-çулĕ çăмăл пулман. Клавдия Петровнана та вăрçă çулĕсенче йывăр тивнĕ. Вĕсем ял халăхĕпе пĕрле окопсем те чавнă, унтан вăрçă аркатнă хуçалăхсене ура çине тăратнă. А.АЛЕКСЕЕВА.