21 июля 2014 г.
Ĕнер патшалăх пушар асăрхавĕн органне туса хунăранпа 87 çул çитрĕ. Раççей МЧС-ĕн патшалăх пушар асăрхавĕ паян пушарсене асăрхаттарас тата профилактика мероприятийĕсем йĕркелес, вут-çулăмран халăха тата пурлăхпа тĕрлĕ объектсене хỹтĕлемелли кирлĕ мерăсене пурнăçлас тĕллевлĕ тухăçлă тытăм пулса тăрать. Ку тытăмри сотрудниксен кулленхи ĕçĕ вут илсе каяссине асăрхаттарас тата профилактика мероприятийĕсем ирттерес енĕпе курăмлă кăтартусем тума, пушарсенче вилекенсен хисепне чакарма тата вут-çулăма пула пĕтнĕ пурлăх калăпăшне пĕчĕклетме май парать. Паянхи кун районта асăннă тытăмăн икĕ сотрудникĕ тимлет: патшалăх пушар асăрхавĕн уйрăмĕн начальникĕ Сергей Сорокин тата аслă инспектор Алексей Ярабаев. Вĕсем те ĕнер хăйсен професси уявне паллă турĕç. Ветерансем те тимлĕхсĕр юлманни савăнтарать. Акă çак уявпа пушар асăрхавĕн районти уйрăмĕн начальникĕнче тимленĕ Владислав Перлов ячĕпе Раççей МЧС-ĕн Чăваш Енри тĕп управленийĕн ертỹçинчен саламлă çыру килнĕ. Палăртмалла, патшалăх пушар асăрхавĕн районти сотрудникĕсем пур предприятие те планпа пăхса хунă тĕрĕслевпе çитме тăрăшаççĕ, çитменлĕхсене тупса палăртассипе тимлеççĕ. Профилактика ĕçне те мала хураççĕ. Ку енĕпе кăçал халăхпа тĕл пулса 155 мероприяти ирттернĕ. Кунсăр пуçне ял тăрăхĕсен пуçлăхĕсене, пушар хуралĕн ĕçченĕсене явăçтарса ялсенче килĕрен çỹренĕ, 2411 кил-çурта тĕрĕсленĕ, çитменлĕхсене тупса асăрхаттарса хăварнă. Н.МИДАКОВА.