28 июля 2014 г.
Хĕрлĕ Чутай шкулĕнчен вĕренсе тухнă И.Я. Яковлев ячĕллĕ педагогика университечĕн студентки Валентина Улянды Пензăри патшалăх педагогика университетĕнче июлĕн 14-17-мĕшĕсенче иртнĕ "Студентсен лидерĕ _ 2014" конкурса хутшăннă. Конкурсра федерацин Атăлçи округĕнчи 14 хулари яшпа хĕр тупăшнă. Чăваш Республикинчен унта конкурсăн регионти тапхăрĕн çĕнтерỹçи Валентина Улянды хутшăнма тивĕçлĕ пулнă. Студентсен лидерĕсем вĕренỹ сферинчи саккунсене пĕлнине, халăх умне тухса калаçма, йывăр вăхăтра, кăткăс лару-тăрура çухалса каймасăр тĕрĕс йышăну тума пултарнине кăтартса панă. Виçĕ кун пынă тупăшура Валентина чылай конкурс витĕр ăнăçлă тухнă, пушă вăхăтсенче вăл ытти çамрăксемпе пĕрле семинарсене, мастер-классене, федерацин Атăлçи округĕнчи ертсе пыракан аслă вĕренỹ заведенийĕсен тытăмĕнчи ертỹçĕсен тренингĕсене хутшăннă. Палăртма кăмăллă, Валентина тăваттăмĕш вырăна тухса округри чи пултаруллă пилĕк студент йышне кĕнĕ. Вăл çавăн пекех "Профсоюз адвокачĕ" номинацире çĕнтернĕ, Диплома тивĕçнĕ. Конкурсра палăрнăшăн хĕр асăнмалăх парнене _ тĕслĕ принтера _ тивĕçнĕ. А.ЗАМУТКИНА.