30 июля 2014 г.
Июлĕн 24-мĕшĕнче Мускавра Раççей Президенчĕ Владимир Путин Чăваш Республикин Пуçлăхĕпе Михаил Игнатьевпа тĕл пулни пирки маларах пĕлтернĕччĕ. Чăваш Ен Пуçлăхĕ Президента республикăри социаллă пурнăçпа экономика лару-тăрăвĕпе паллаштарнă. Çавăн пекех республикăра ача сачĕсене черете тăрассине пĕтерессипе йышăннă мерăсем тата çамрăк çемьесене тивĕçлĕ пулăшу парас енĕпе регионти программăсем епле пурнăçланнине сỹтсе явнă. РФ Президенчĕпе Чăваш Ен Пуçлăхĕ тĕл пулни пирки районти ĕç ветеранĕ, Туктамăш ялĕнче пурăнакан Валерий Константинович Романов мĕн шухăшлани пирки интереслентĕмĕр. _ РФ Президенчĕ В.Путин республика Пуçлăхĕпе М.Игнатьевпа тĕл пулни _ Чăваш Еншĕн парăмлă пулăм. Унта республикăн социаллă экономика аталанăвĕ пирки пĕлтерĕшлĕ ыйтусене сỹтсе явнă. Эпĕ хам Чăваш çĕрĕ çинче çуралса ỹснишĕн, кунтах тĕпленсе пурăннишĕн савăнатăп. Паянхи кун Чăваш Ен _ çĕр-шывра паллă регионсенчен пĕри. Çултан-çул тăван республика аталанса, илемленсе пырать. Çулсерен çĕкленекен капмар та хăтлă çуртсем, çул, газ, таса шыв хресчене хальхи саманапа тан пурăнма май параççĕ. Нумай ачаллă çемьесен шучĕ те ỹсни çакна çирĕплетет. Ачасен шучĕ ỹснĕрен ача сачĕсенче те вырăнсем çителĕклĕ кирлĕ. Çавна май республика Пуçлăхĕ çĕнĕ ача сачĕсене хута ярассине пысăк тимлĕх уйăрать. Пирĕн районта та 2015 çулта Хĕрлĕ Чутай салин Кивĕ центрĕнче хальхи йышши çĕнĕ ача сачĕ хута каймалла. РФ Президенчĕн Указĕсенче тата Чăваш Ен Пуçлăхĕн йышăнăвĕсенче палăртнă хавхалантару мерисем пурнăçлансах пыраççĕ. Халăхăн пурнăç условийĕсене лайăхлатма пулăшакан ĕçсене асăнса та пĕтерме çук. Малашне те Чăваш Ен аталансах, ỹссех пытăрччĕ. Н.ПЕТРОВА.