30 июля 2014 г.
Июль уйăхĕн юлашки кунĕсене "çавапа çурла тĕл пулнă вăхăт" теççĕ: ял хуçалăх предприятийĕсенче выльăх апачĕ хатĕрлеççĕ, çав хушăрах уй-хирте вырма ĕçĕсем сарăлса пыраççĕ. Хальхи саманара, паллах, ял хуçалăхĕнчи ĕçсене ĕлĕкхи пек çавапа çурла вăйĕпе пурнăçламаççĕ _ хĕрỹ ĕç çире уйсемпе хирсенче, йĕтем çинче çĕнĕ йышши техника шавĕ тăрать... Вырма ĕçĕсем сарăлсах пыраççĕ, йĕтем çинче те ял çыннисемпе шкул ачисем хутшăннипе ĕç вĕресе тăрать. Районти тăхăр ял хуçалăх предприятийĕнчен июлĕн 28-мĕшĕ тĕлне тырă вырма пилĕк хуçалăх тухнă: "Коминтерн" (мĕн пур вырмалли лаптăкăн 11 процентне пухса кĕртнĕ), "Нива" (14,6 процент), "Свобода" (22,7 процент), Н.Лисаев фермер (13,7 процент), В.Никитин (37,7 процент). Ыттисем _ "Путь Ильича" УАО, "Авангард" ТЯО, "Победа", "Аккозинский" ЯХПК-сем хальлĕхе уй-хире тухман-ха. Паянхи кун район уй-хирĕнче 11 комбайн тырă вырать. Кунне пĕр комбайна вăтамран 17 гектар лаптăк тивет. Июлĕн 29-мĕшĕ тĕлне районти хуçалăхсенче пĕрчĕллĕ тата пăрçа йышши культурăсене 575 гектар вырнă, 1189 тонна çапса тĕшĕленĕ. Тухăç лайăх илекенсен шутне чи малтан "Свобода" колхоза кĕртмелле. Унта пĕр гектартан 25 центнер тĕш тырă илеççĕ. Н.Лисаев фермер хуçалăхĕнчи тĕш тырă тухăçĕ 22,0 центнерпа, "Коминтерн" тата "Нива" хуçалăхсен 20 тата 18,8 центнерпа танлашать. А.ЗАМУТКИНА.