30 июля 2014 г.
Çулсеренех Пĕтĕм Раççейĕпех июлĕн юлашки вырсарни кунĕнче Тинĕс çар флочĕн кунне паллă тăваççĕ. Кăçал вăл июлĕн 27-мĕшне килчĕ. Районта çуралса ỹснĕ, çĕр-шыв умĕнчи тивĕçне Тинĕс çар флотĕнче пурнăçланă арçынсемпе яшсем те çак кун район центрĕнчи Çĕнтерỹ лапамĕнче пухăнчĕç. Чи малтанах флотра службăра тăнисене район администрацийĕн пуçлăхĕ Александр Башкиров саламларĕ, Тинĕс çар флочĕ ĕлĕкренех чаплă та мухтавлă пулни пирки асăнчĕ, моряксене хăйсен тивĕçне чыслăн пурнăçланăшăн тав турĕ. Çавăн пекех салам сăмахне запасри моряк Николай Михопаркин, 2 рангри капитан Виталий Селезенкин тата С.О.Макаров академик ячĕпе хисепленекен патшалăх тинĕс академийĕн курсанчĕ Денис Егоров илчĕç, пурне те уяв ячĕпе саламласа ырлăх-сывлăх сунчĕç. Уявсенче хисеп хучĕсем парса саламласси ырă йăлара ĕнтĕ. А.В.Башкиров та активистсене район администрацийĕн Тав çырăвĕсемпе наградăларĕ. Ку чыса Петр Баринов, Александр Катюков, Виталий Чишкин, Юрий Осипов, Федор Тимкин, Александр Юманкин, Александр Мидаков тата ытти моряксем те тивĕçрĕç. Палăртмалла, кăçал уяв тĕлне моряксем хăйсен малтанхи ĕмĕтне пурнăçа кĕртрĕç _ Çĕнтерỹ лапамĕнче фонтан çывăхĕнче çар морякĕсене халалласа палăк вырнаçтарчĕç. Çĕрне райадминистраци уйăрса панă, пур ĕçе те вара моряксем хăйсен шучĕпе тата вăйĕпе кар тăрса пурнăçланă. Палăк çумĕнче якорь те вырнаçтарма шухăшланă, анчах ăна уяв тĕлне çитерме май килмен. Тунти кунах вăл хăйĕн тĕп вырăнне йышăнчĕ. Асăннă палăка уяв кунне савăнăçлă лару-тăрура уçрĕç, вăл малашне моряксен пухăнмалли яланхи вырăнĕ пуласса палăртрĕç. Савăнăçлă мероприятие пĕчĕк концертпа спорт вăййисем илемлетрĕç. Канат туртассипе Çурçĕр Тинĕс çар флотĕнче службăра тăнисем вăйлăрах пулчĕç. Кире пуканне пуринчен нумай йăтса вара Анат Чутайра пурăнакан Федор Тимкин палăрчĕ. Уявăн иккĕмĕш пайĕ çут çанталăк ытамĕнче, флотри çар тивĕçне аса илсе шыв хĕрринче иртрĕ. Н.МИДАКОВА.