04 августа 2014 г.
Çĕнĕ вĕренỹ çулĕ тата юбилей умĕн çуллахи кунсенче Мăн Этмен шкулĕнче ĕç шавĕ чакмасть: курăмлă тата вак-тĕвек юсав ĕçĕсем пыраççĕ. Нумаях пулмасть шкулти ĕçсем мĕнле пынине район администрацийĕн пуçлăхĕ Александр Башкиров тата унăн çумĕ, вĕренỹ пайĕн начальникĕ Алексей Порфирьев çитсе курнă. Вĕсем юсав ĕçĕсене хак панă, куç умне курăнакан çитменлĕхсене пĕтерме хушса хăварнă. Шкул директорĕ Игорь Живоев хăнасене туса ирттернĕ юсав ĕçĕсен калăпăшĕпе паллаштарнă. Палăртмалла, 2994 тăваткал метр лаптăклă, виçĕ хутлă шкул çурчĕ хăйĕн юбилейне юсаса çĕнетнĕ акт залĕнче кĕтсе илĕ. 120 çын вырнаçмалли залăн урайне çĕнĕрен сарнă, стенисене штукатурка туса якатнă, çутă тĕспе сăрланă, сценăна реконструкциленĕ тата ытти ĕçсене пурнăçланă. Малтан кăвак тĕслĕ пулнă залра сивĕ пек туйăннă пулсан, халĕ унта урăхла, хăтлă та çутă. Кунта кирлĕ хатĕр-хĕтĕр вырнаçтарсан тĕрлĕ мероприятисем ирттерме меллĕ пуласси куç кĕрет. Шкул ертỹçи шăп çакăнта ачасен пултарулăхне аталантармалли, кăтартмалли майсем туса пама тăрăшать. Кĕркунне Мăн Этмен шкулĕ 100 çул тултарнине паллă тăвĕ. Ăна хатĕрленессине тапхăрăн-тапхăрăн йĕркелеççĕ. Юсав ĕçĕсене хăйсен вăйĕпе пурнăçлаççĕ, унта водительсем те, техперсонал та, воспитательсемпе учительсем те хутшăнаççĕ. Шкул директорĕ Игорь Нестерович ачасен ашшĕ-амăшне те пулăшу кỹме ыйтнă. Тĕслĕхрен, Алевтина Никифорова хаваспах пулăшма хатĕррине пĕлтернĕ. Акă, Ольга Михеева çемйи акт залне юсассине пысăк тỹпе хывнă. Сăмах май, шкулăн спортзалне те улшăнусем кĕтеççĕ. Мăн Этмен шкулĕ 2014 çулта яллă вырăнсенчи вĕренỹ учрежденийĕсенче физкультура тата спорт занятийĕсене ирттерме майсем йĕркелесе памалли мероприятисен комплексне пурнăçламалли списока кĕнĕ. Çавна май шкулăн спортзалĕнче пластик чỹречесем лартмалла, урайне улăштармалла, унта хывăнса тăхăнмалли, çăвăнмалли пỹлĕмсем пулмалла. Кунти юсав ĕçĕсене подряд организацийĕ пурнăçлать. Юсав ĕçĕсене августăн 15-мĕшĕччен вĕçлеме палăртнă. А.ЗАМУТКИНА.