11 августа 2014 г.
Çак эрнере пирĕн района ĕçлĕ çул çỹревпе Чăваш Республикин Патшалăх ветеринари службин ертỹçи Сергей Скворцов килсе кайнă. Сергей Иванович районти темиçе ял хуçалăх предприятине çитсе выльăх апачĕ хатĕрлес ĕçпе тата вырма мĕнле пынипе паллашнă. Патшалăхăн тĕп ветеринари инспекторĕпе пĕрле хуçалăхсенче район администрацийĕн ял хуçалăх пайĕн начальникĕ Владимир Храмов, районти выльăх-чĕрлĕх чирĕсемпе кĕрешекен станци начальникĕ Лев Гущин пулнă. "Нива" ЯХПК-ра Ĕçлĕ çул çỹреве патшалăх ветеринари службин ертỹçи Сергей Скворцов "Нива" хуçалăхăн уй-хирне пăхса çаврăннинчен пуçланă. Ку ял хуçалăх производство кооперативĕ малта пыракансенчен пĕри. Халĕ унта выльăх апачĕ хатĕрлессипе те, вырма енĕпе те ĕç вĕресе кăна тăрать. Хуçалăхăн пĕрчĕллĕ тата пăрçа йышши культурăсем 1098 гектар йышăнаççĕ. Ку вăхăт тĕлне 358 гектарне тирпейленĕ, 680 тонна тыр-пул çапса тĕшĕленĕ. Выльăх апачĕ хатĕрлес ĕçе те аван йĕркеленĕ. Мучикассисем 450 тонна утă, 1114 тонна силос хывнă. Калас пулать, хуçалăх çĕрпе тухăçлă усă курма тăрăшать. Вăл районти ытти хуçалăхсенчен малтан çĕртме тума тытăннă. Çитес çул çурхи культурăсене акма 120 гектар çĕр сухаласа хатĕрленĕ. Йĕтем çинче халăх йышлă. Пурин аллинче те ĕç хатĕрĕ _ хиртен илсе килнĕ тырра тасатса кăлараççĕ, пỹлмене кĕртме хатĕрлеççĕ. Аслисемпе тан шкул ачисем тăрăшса ĕçлеççĕ. Анчах вĕсен ĕç кунĕ тулли мар. Хуçалăха пулăшма тухнă ял çыннисене вĕри апатпа тивĕçтереççĕ. Йышпа вара ĕç те ăнать. _ Çуллахи каникул вăхăтĕнче ачасене ĕçе явăçтарни усăллă. Вĕсем хăйсене тĕллĕн ĕçлеме хăнăхаççĕ, çăкăр мĕнле пулнине ăнланма тытăнаççĕ. Пирĕн паянах ялти кадрсен резервĕ пирки шухăшламалла, _ тенĕ Сергей Скворцов. Кăçалхи вырма вăхăтĕнче хĕрлĕчутайсен пĕрчĕллĕ тата пăрçа йышши культурăсене 5100 гектар лаптăкран пухса кĕртмелле. Тĕш тырра вырса илес ĕç пур çĕрте те пырать. Августăн 8-мĕшĕ тĕлне çĕр ĕçченĕсем 1303 гектартан тыр-пул пухса кĕртнĕ. Вăтам тухăç 18,2 центнерпа танлашать. Пĕтĕмпе 2396 тонна ытла тыр-пул çапса тĕшĕленĕ. Вырмана 10 комбайн тухнă. Фермер хуçалăхĕнче Сергей Иванович Пантьăк тăрăхне те çитсе курнă, Николай Лисаев фермер хуçалăхĕнче вырма ĕçĕ мĕнле пынипе интересленнĕ. Йĕтем çинче тата бройлер кăвакал чĕпписене ỹстермелли цехра пулнă. Фермерăн пĕрчĕллĕ культурăсене 874 гектартан пухса кĕртмелле. Паянхи кун тĕлне 333 гектар лаптăка тирпейленĕ. Фермер ултă пине яхăн бройлер кăвакал чĕппи пур. Вĕсене тĕрĕс-тĕкел ỹсме условисем туса панă, чĕпĕсене йĕркесене, правилăсене пăхăнса çитĕнтереççĕ. Юлашкинчен Сергей Скворцов районти ветеринари ĕçченĕсемпе тĕл пулнă. А.ЗАМУТКИНА.