Публикации » Йывăрлăхра никам та пĕччен юлмĕ

13 августа 2014 г.

Августăн 10-мĕшĕнче Симферопольтен Шупашкара ятарлă самолет вĕçсе килнĕ. Вăл Чăваш Ене Украинăран тарса килекен 112 çынна (вăл шутра 34 ача) илсе çитернĕ. Тĕп хулара вĕсене Инкеклĕ ĕçсен министерствин оперативлă ушкăнĕ кĕтсе илнĕ. Хỹтлĕх шыракансене Транспортпа çул-йĕр министерствин тата республикăри "Чувашавтотранс" хуçалăх ĕçченĕсем вăхăтлăх пурăнмалли пунктсене çитерме пулăшнă. Палăртмалла, паянхи кун Украинăран тарса килекенсене пулăшас ыйту правительствăри ларусемпе канашлусенче чи актуаллă вырăн йышăнать. Раççей Федерацийĕн Правительствин йышăнăвĕпе Чăваш Республикин Украинăран таракансен йышĕнчен 0,26 процентне йышăнмалла. Вĕсене вырнаçтарма тата пулăшма республика укçа-тенкĕ уйăрса памалла тунă 40 регион шутне кĕнĕ. Вăрçа пула мирлĕ çĕр-çĕр çын паянхи кун хỹтлĕхпе пулăшу кĕтет. Вĕсене халĕ кулленхи япаласем, тумтир, çавăн пекех психологи, медицина тата финанс пулăшăвĕ кирлĕ. "Чăваш Республикинчи хĕрарăмсен канашĕ" общество организацийĕ тарса килнĕ граждансене ятран пулăшмашкăн укçа-тенкĕ куçарма хăйĕн Ыр кăмăллăх фончĕн расчет счетне сĕннĕ.