13 августа 2014 г.
Шăмат кун районти тĕп стадиона спорта юратакансем нумаййăн пухăнчĕç. Спорт мероприятине уçнă май район пуçлăхĕ Александр Башкиров пухăннисене Физкультурник кунĕ ячĕпе саламларĕ. Савăнăçлă самантпа усă курса Александр Викторович райадминистрацин строительство, çул-йĕрпе коммуналлă хуçалăх пайĕн начальникĕн тивĕçĕсене пурнăçлакан Алексей Магаськина Тав çырăвĕ парса чысларĕ. Районти пенсионерсен пĕрлешĕвĕн председателĕ Юрий Егоров уявпа саламланипе пĕрлех республикăри спартакиадăна активлă хутшăннă Галина Ермеевана, Валерий Сатлайкина, Вячеслав Дадюкова, Варвара Колокольчикована, Валентин Харитонова, Людмила Михуткинана тав турĕ, Раççей пенсионерĕсен вырăнти пĕрлешĕвĕн грамотисемпе наградăларĕ. Савăнăçлă мероприяти массăллă хусканусенчен пуçланчĕ. Кĕлетке-çурăма çемçетнĕ хыççăн спортсменсем ăмăртусенче тупăшрĕç. Ял тăрăхĕсенчен килсе çитнĕ 100 яхăн спортсмен хутăш эстафетăра ăмăртрĕ, канат та туртрĕ, ишес, футбол выляс тата ытти енĕпе вăй виçрĕ. Çĕнтерỹçĕсемпе редакци сайтĕнче паллашма май пур. А.ЗАМУТКИНА.