13 августа 2014 г.
Чăваш Республикинче ăшă çанталăк тăнă май ачасем чỹречерен тухса ỹксе сусăрланнă е вилнĕ тĕслĕхсем нумайланнă. Ку инкексене РФ Следстви комитечĕн Чăваш Республикинчи управленийĕн следователĕсем тĕплĕ тĕпчеççĕ, пĕтĕмлетỹсемпе уголовлă ĕç пуçарни те час-часах пулкалать. Тĕслĕхрен, 2014 çулхи июнĕн 8-мĕшĕнче каçхине Шупашкарти Ярмăрккă урамĕнчи çуртăн 10-мĕш хутĕнчен çулталăк çурăри ача тухса ỹкнĕ. Ку фактпа РФ Уголовлă Кодексĕн 109-мĕш статйин 1-мĕш пайĕпе асăрханусăр пулнипе вилĕм патне çитернишĕн уголовлă ĕç пуçарнă. Унăн материалĕсем кăтартса панă тăрăх, çемье çывăрма хатĕрленнĕ. Унччен пỹлĕме уçăлтарма шутланă: москитлă сетка вырнаçтарнă залри чỹречене уçса хунă. Ашшĕ-амăшĕ хăйсен ĕçĕсемпе кухньăна кайнă хушăра çулталăк çурăри тата виççĕри хĕр ачисем залра юлнă. Тем вăхăтра кĕçĕн ачи чỹрече ани çине хăпарса кайнă та москитлă сетка çине сĕвеннĕ. Çак самантра хĕр ача москитлă сеткăпа пĕрле урамалла тухса ỹкнĕ. 10-мĕш хутран ỹкнĕскер йывăр сурансене пула тỹрех вилсе кайнă. Çакăн пек инкексем тăтăшах пулни Следстви управленине хытах хумхантарать. Тишкерỹ ачасем çỹллĕшрен ỹксе вилнин сăлтавĕ пурин те пĕрешкел пулнине çирĕплетет. Ачасем уçă чỹрече патне хăпарса тăраççĕ е ăна хăйсемех уçса сеткăпа пĕрле тухса ỹкеççĕ. Нумай тĕслĕхре айăпĕ аслисенче: вĕсем юнашар пулманни, кантăка хупма манса кайни, сĕтел-пукана тĕрĕс мар вырнаçтарса лартни, ачасене хăйсене тĕллĕн кантăк умне пыма чарманни, москитлă сетка чỹречене хупă пек кăтартни. Следстви управленийĕ ашшĕ-амăшне, аслашшĕ-асламăшне питĕ асăрхануллă пулма чĕнсе калать. Уçă кантăк умĕнче ача тăнине асăрхасан иртсе ан кайăр, хăвăртрах полицие шăнкăравлăр. Пĕчĕк ачасене тимлĕхсĕр ан хăварăр! Çакă пысăк инкекпе вĕçленме пултарать.
ЧР Следстви управленийĕ.