20 августа 2014 г.
Августăн 15-мĕшĕнче ĕçлĕ çул çỹревпе пирĕн района "Пĕрлĕхлĕ Раççей" партин регионти уйрăмĕн секретарĕ, ЧР Патшалăх Канашĕн Патшалăх строительствин, вырăнти хăй тытăмлăх, Регламентпа депутат этикин комитечĕн председателĕ Николай Малов килсе кайнă. Вăл ял хуçалăх, вĕрентỹỹ, строительство ыйтăвĕсемпе интересленнĕ. Николай Владимирович "Нива", "Коминтерн" хуçалăхсенче пулнă. Вырма тата выльăх апачĕ хатĕрлес ĕçсемпе паллашнă. Асăннă хуçалăхсенче уяр çанталăкпа туллин усă курса тыр-пула тăкаксăр пухса кĕртме тăрăшаççĕ. Пĕрчĕллĕ тата пăрçа йышши культурăсен лаптăкĕсене çуррине яхăн тирпейленĕ ĕнтĕ. Мучикассисемпе атнарсем гектар пуçне 18-20 центнер тырă илеççĕ. Çавăн пекех Николай Малов Мăн Этмен тата Атнар шкулĕсенче "Единая Россия" партин "Ача-пăча спорчĕ" проекчĕпе килĕшỹллĕн пурнăçланакан юсав ĕçĕсене тишкернĕ. Спорт залĕсем çĕнелни проект пурнăçа кĕнине çирĕплетнĕ. Унсăр пуçне Николай Малов савăнăçлă лару-тăрура Чăваш наци конгресĕн председателĕнчен, ЧР Патшалăх Канашĕн депутатĕнчен Николай Угасловран Атнарти Мигушкинсен нумай ачаллă çемйине çурт тума 10 пин кирпĕч туянмалăх сертификат парса чысланă. Николай Владимирович Хĕрлĕ Чутай салинчи Ленин урамĕнче çĕкленекен 27 тата 22 хваттерлĕ çуртсен строительствипе те паллашнă. Пĕрремĕш çуртĕнче халĕ шалти ĕçсем пыраççĕ.Тепринне виççĕмĕш хутне купалаççĕ. Çуртсене кĕркунне туса пĕтерме палăртнă. Пĕтĕмĕшле илсен, депутат районти ĕçсемпе кăмăллă пулнине пĕлтернĕ. "Ыйтусем пулсан пĕрле татса парăпăр", _ тенĕ вăл çул çỹреве пĕтĕмлетнĕ май. А.ДМИТРИЕВА.