20 августа 2014 г.
Иртнĕ вырсарни кун республикăра пурăнакансем Шупашкар хули никĕсленнĕренпе 545 çул çитнине анлăн паллă турĕç. Çак кун тĕп хуламăрта уяв мероприятийĕсем чылай иртрĕç. Уява 300 пин ытла хула çыннипе хăна хутшăннине палăртаççĕ. "Çăлтăрпа пĕрле _ ирхи зарядкăна". Залив хĕрринче йăлана кĕнĕ спорт тата сывă пурнăç йĕркин "Çăлтăрпа пĕрле _ ирхи зарядкăна" мероприяти пулнă. Унта республика Пуçлăхĕ Михаил Игнатьев та хăйĕн çемйипе хутшăннă. Ирхи зарядка тĕрлĕ ỹсĕмри пин-пин çынна пухнă. Мероприятин ятарлă хăнисен йышне легендăна кĕнĕ Шаолинь мăнастирĕн манахĕсем тата Намиби Республикин Окаванго провинцийĕпе унăн Рунду тĕп хулин делегацийĕ кĕнĕ. Манахсем куракансене хăйсен илемлĕ хусканăвĕсемпе паллаштарнă. "Аквабайк-Шоу". Шупашкар заливĕн акваторийĕнче опытлă спортсменсем тата хальхи йышши шыв техники хутшăннипе чуна çĕклекен "Аквабайк-Шоу" иртнĕ. Куракансем фристайл енĕпе Хусанти чи лайăх аквабайкер-каскадерсен пултарулăхĕпе киленме пултарнă. "Стрижи" пилотаж ушкăнĕн вĕçевĕ. Уяв хăнисем сывлăш çар вăйĕсен "Стрижи" ("Вĕршĕн") аслă пилотаж авиаци ушкăнĕн тĕлĕнмелле маçтăрлăхĕпе киленнине вара чылай асра тытĕç. Палăртса хăвармалла, çак ушкăн уява Чăваш Ен Пуçлăхĕ Михаил Игнатьев Раççей оборона министрĕпе Сергей Шойгупа калаçса татăлнипе килнĕ. МиГ-29 вĕçевçисем 200-тен пуçласа 1,6 пин метр çỹлĕшĕнче сехетре 300-тен пуçласа 800 километр таран хăвăртлăхпа вĕçнĕ. "Стрижи" ("Вĕршĕн") пилотаж ушкăнĕн 21-мĕш кăтартуллă вĕçевĕ, палăртма кăмăллă, Раççейĕн 21-мĕш регионĕнче _ Чăваш Республикинче _ иртнĕ. "Пултарулăх бульварĕ" арт-проект. Хула кунĕнче "Пултарулăх бульварĕ" арт-проект та ĕçленĕ. Вăл Гагарин урамĕнчен пуçласа Хĕрлĕ лапама çитиех тăсăлнă. Интерактивлă ятарлă вырăнсенче 545 артист тата тĕрлĕ пултарулăх коллективĕсем хăйсен ăсталăхĕпе паллаштарма кăмăл тунă. Кунта "Пирĕнпе ăсталăр", "Литература картишĕ", "Чаршава уçса", "Литература каçĕ" тата ытти площадкăсем ĕçленĕ. "Джигитовка". "Шупашкар хулине _ 500 çул" паркра та савăнăçлă лару-тăру хуçаланнă. Артистсем халăха савăк юрăсем парнеленĕ. Палăртнă вăхăтра вара Çĕнĕ Шупашкарти А.И.Тихонов ячĕпе хисепленекен лашапа спорт клубĕн вĕренекенĕсем хăйсен пултарулăхĕпе паллаштарма кăмăл тунă. Хĕр ачасемпе арçын ачасем лаша çинче ларса пырса тĕрлĕ хусканусем туса халăха тыткăнланă. Вĕсен аллинче хĕç те, ялав та илемлĕн вылянă, пĕр лаша çинче харăсах иккĕн те хăйсен пултарулăхне кăтартма пултарнă. Хĕрсен пултарулăхĕ те каччăсеннинчен кая мар пулни пурне те тĕлĕнтернĕ. "Шупашкар _ санăн çĕнтерĕвỹсен хули!" Республика Пуçлăхĕ Чăваш Енĕн тĕп хули 545 çул тултарнине халалланă "Шупашкар _ санăн çĕнтерĕвỹсен хули!" савăнăçлă уява та хутшăннă. Çавăн пекех унта авиаци генерал-лейтенанчĕ, Раççей Геройĕ, Шупашкар хулин тата Чăваш Республикин Хисеплĕ гражданинĕ Николай Гаврилов мăшăрĕпе, Шупашкар тата Чăваш митрополичĕ, Шупашкар - Чăваш Епархийĕн управляющийĕ Варнава Владыка, ĕç тăвакан власть органĕсен ертỹçисем, Шупашкар хулин ертỹлĕхĕ, ЧР Патшалăх Канашĕн тата Шупашкар хула Пухăвĕн депутачĕсем, политика партийĕсемпе общество организацийĕсен представителĕсем, "Стрижи" вĕçев ушкăнĕнчи летчиксем, официаллă çынсем пулнă. Михаил Игнатьев хула çыннисемпе хăнасене Хула кунĕпе саламланă, хăйсен хулине юратакан, ăна пĕрлехи вăйпа пушшех те илемлетекен шупашкарсене тав тунă. "Чăваш Ен тĕп хулипе сывлăшран та, космосран та киленме май пур, мĕншĕн тесен Шупашкар _ питĕ илемлĕ хула", _ тенĕ авиаци генерал-лейтенанчĕ Николай Гаврилов. Хулан паллă вырăнĕсенче кунĕпех пуян программăллă та интереслĕ мероприятисем, çав шутра концертсем те чылай иртнĕ. Пурне те асăнса çитерме те çук. Шупашкар хулине йĕркеленĕренпе 545 çул çитнине халалланă мероприятисем Раççей эстрада тата джаз çăлтăрĕн, РФ халăх артисткин Лариса Долинан концерчĕпе тата уяв фейерверкĕпе вĕçленнĕ. Шупашкарта пурăнакансем тата килнĕ хăнасем уяв мероприятийĕсен шайне пысăк хак панă, питĕ усăллă тата интереслĕ пулнине палăртнă. Н.ПЕТРОВА.