25 августа 2014 г.
Августăн 19-мĕшĕнче Чăваш Республикин Пуçлăхĕ Михаил Игнатьев "Раççей _ спорт патшалăхĕ" форума йĕркелесе ирттерес енĕпе Мускавра ĕçлекен йĕркелỹ комитечĕн пĕрремĕш ларăвне хутшăннă. Ларăва Раççей спорт министрĕ Виталий Мутко ертсе пынă. Вăл йĕркелỹ комитечĕн членĕсене форума ирттермелли вырăна Президент Владимир Путин хăй суйланине пĕлтернĕ. "Тỹрех калатăп _ ăна вăл ăнсăртран суйламан. Президент Чăваш Республики юлашки çулсенче физкультурăпа спорта аталантарас тĕлĕшпе ăнăçлă ĕçленине шута илнĕ. Кунта материаллă тата техника никĕсĕ лайăх аталанать, физкультурăпа спорта явăçма условисем çителĕклĕ, спортпа туслисен шучĕ çулсерен ỹссе пырать. Спорт резервне хатĕрлес тытăма модернизациленĕ, ачасемпе çамрăксен спорт шкулĕсен никĕсĕ çирĕпленет, республика представителĕсем çĕр-шывăн пĕрлештернĕ наци командисене кĕресси ỹсет. Чи пĕлтерĕшли _ юлашки çулсенче Чăваш Ен пысăк калăпăшлă спорт форумĕсем тата турнирсем ирттерекен центр пулса тăчĕ. Çавăнпа Владимир Путин халăхсем хушшинчи "Раççей _ спорт патшалăхĕ" форума Шупашкарта ирттерме йышăнчĕ. Вăл хăй те форумăн пленарлă ларăвĕсене хутшăнассине пĕлтерчĕ",_ палăртнă Виталий Мутко. Спорт министрĕ çавăн пекех форумра сỹтсе явмалли тĕп темăсенчен пĕри спорт резервне хатĕрлес ыйту пулнине пĕлтернĕ. "Спортăн пысăк çитĕнĕвĕсенче пирĕн кăтартусем япăх мар. Вĕсене çирĕплетме спорт учрежденийĕсене модернизацилемелле", _ тенĕ министр. Чăваш Ен Пуçлăхĕ Михаил Игнатьев хăйĕн сăмахĕнче халăхсем хушшинчи "Раççей _ спорт патшалăхĕ" форума Шупашкарта йышăнма пысăк чыс тата яваплăх пулнине палăртнă. Çавăнпа ЧР Министрсен Кабинечĕ, вырăнти хăй тытăмлăх органĕсем, обществăлла организацисем, республикăра пурăнакансем форума активлă хатĕрленме пуçланине пĕлтернĕ.
Палăртмалла, республика Пуçлăхĕ Раççей шайĕнчи ларăва хутшăниччен форума хатĕрленсе ирттерес енĕпе ĕçлекен республикăри комитечĕн ларăвне хутшăннă. Республикăра халăхсем хушшинчи "Раççей _ спорт патшалăхĕ" форума Шупашкарта ирттермешкĕн хатĕрленме пуçланă ĕнтĕ. Унта хутшăнакансене транспортпа тивĕçтермелли схемăна йĕркеленĕ. Форума хутшăнакансене сывлăшри тата чукун çул транспорчĕсемпе турттарĕç. Аккредитациленĕ (43) хăна çурчĕсен списокне çирĕплетнĕ. Вĕсенчен 28-шĕ _ тĕп хăна çурчĕсем, вĕсенче 2932 вырăн тата 15 резерв вырăнĕ, 500 хушма вырăн йышăнса хунă. Форума хатĕрленсе культура программисен концепцине йышăннă. Вăл форумăн тĕп площадкисенче иртекен мероприятисен сценарийĕсене йĕркелеме май парĕ. Форум вăхăтĕнче хута каякан тата ĕçлекен спорт объекчĕсене çитсе курассине йĕркелĕç, вăл шутра Шупашкарти çичĕ пин çын вырнаçмалăх пăр арениллĕ нумай функциллĕ, универсаллă центр та. Пĕтĕмпе форум мероприятийĕсене 23 спорт объектне явăçтарĕç. "Çирĕплетсех калама пултаратăп, тĕрлĕ ăмăртусем, ĕçлĕ, культурăллă форумсем ирттерсе çулсем витĕр туптаннă опыт çĕр-шывăн пĕлтерĕшлĕ мероприятине çỹллĕ шайра ирттерме пулăшĕ", _ тенĕ Михаил Васильевич. Ларура форумăн программипе концепцине çирĕплетнĕ. Форума йĕркелени Раççей спорт конкурентлăхне пĕтĕм тĕнчери спорт аренинче хăпартма, çавăн пекех халăха спорта явăçтарма, сывă пурнăç йĕркине тытса пыма пулăшасса шанаççĕ. Форумпа килĕшỹллĕн пленарлă ларусем, наукăпа практика конференцийĕсем, çавра сĕтелсем, мастер-классем, фестивальсем, спорт çитĕнĕвĕсен куравĕсем тата ытти мероприятисем иртмелле. А.ЗАМУТКИНА.