25 августа 2014 г.
Аслă Çĕнтерĕве 70 çул çитнĕ куна кĕтсе илес кăмăлпа пурăнать 90 çул тултарнă тыл ĕçченĕ. Ишеккассинче пурăнакан вăрăм ĕмĕрлĕ хĕрарăмсенчен пĕри вăл _ августăн 18-мĕшĕнче 90 çул тултарнă Анна Леонтьевна Зайцева. Хисеплĕ ватăна сумлă юбилей ячĕпе саламлама райадминистрацинчен, ял тăрăхĕн администрацийĕнчен, социаллă хỹтлĕх пайĕнчен хăнасем çитнĕ, РФ Президенчĕн Владимир Путинăн саламлă Çырăвне вуласа панă. Хирлỹкассинчи Пигильдинсен çемйинче çуралса ỹснĕ Анна Леонтьевна. Ашшĕ вăрçă пуçланичченех вилнĕ, çавна пулах çичĕ класс пĕтернĕ хĕр саккăрмĕш класа каяйман _ малалла вĕренме укçа кирлĕ пулнă. Хăрушă вăрçă пуçлансан Анна ыттисемпе танах тар тăкнă _ вăрманта ĕçленĕ, окопсем чавнă. Дояркăра та вăй хунă вăл. Çĕнтерĕве çывхартас тесе ырми-канми тăрăшнă. Вăрçă хыççăн Анна Леонтьевна Ишеккасси каччипе Владимир Зайцевпа çемье çавăрнă. Мăшăрĕпе вĕсем ултă ачана _ икĕ хĕрпе тăватă ывăла _ кун çути парнеленĕ, пурнăç çулĕ çине кăларнă. Шел те, Владимир Федорович 15 çул каяллах çĕре кĕнĕ. Мăшăрĕпе пĕрле лартнă кил-çуртра Анна Леонтьевна халĕ пĕчченех пурăнать. Çак урамрах тĕпленнĕ Иван кĕçĕн ывăлĕпе Маргарита кинĕ ватă амăшне пăхсах, пулăшсах тăраççĕ. Çĕр-шывăн тĕрлĕ кĕтессине саланнă ытти ачисем те амăшне манмаççĕ, тăван килне килсех çỹреççĕ. 12 мăнукĕпе 12 кĕçĕн мăнукĕн çитĕнĕвĕсемшĕн савăнса пурăнать халĕ Анна Леонтьевна. Мĕн тивĕçлĕ канăва тухиччен колхозра вăй хунă Анна Зайцева _ ĕç ветеранĕ, тыл ĕçченĕ. Вăрçă ветеранĕн тăлăх арăмĕ пулнăран кил-çурт условийĕсене лайăхлатма сертификата та тивĕçнĕ вăл. Вăрăм ĕмĕрлĕ ватă халĕ те таса ăс-тăнпах пурăнать _ иртнине те пĕтĕмпех ас тăвать, хальхи пурнăçпа та кăсăкланать. Телевизор та пăхать, районта тата республикăра тухса тăракан хаçатсене те çырăнса илет. Ватăн куçĕ витĕрех мар пулнăран хаçатра мĕн çырнине хунямăшне кинĕ вуласа парать. Кил таврашĕнче вăрахăн хăех кăштăртатса çỹрет Анна Леонтьевна, хăнасем килсен вара питĕ савăнать. Çитес çул Аслă Çĕнтерĕве 70 çул çитнĕ уява кĕтсе илес кăмăлпа кун кунлакан ватăна тата нумай çул таса-сывă пурăнма сунатпăр. А.ТИМОФЕЕВА.