25 августа 2014 г.
Республикăра пыракан Хăрушсăрлăх уйăхĕн шайĕнче августăн 21-мĕшĕнче Хĕрлĕ Чутай ял тăрăхĕнче Хăрушсăрлăх кунĕ иртрĕ. Мероприятие Чăваш Республикин пушар асăрхавĕн тĕп патшалăх инспекторĕ Николай Петров полковник, Хĕрлĕ Чутай ял тăрăхĕн пуçлăхĕ Леонид Аргандейкин, райадминистрацин ятарлă программăсен пай начальникĕ Валерий Жиганов, районти ял тăрăхĕсен пуçлăхĕсем, организацисемпе учрежденисен ертỹçисем хутшăнчĕç. Чи малтанах Леонид Аргандейкин ял тăрăхĕнчи пушарсемпе çыхăннă лару-тăрупа паллаштарчĕ, пурне те йăлара та, çут çанталăкра та вут-çулăмпа асăрхануллă пулма чĕнсе каларĕ. Валерий Жиганов районта пушар хăрушсăрлăхĕ енĕпе туса пынă ĕçсем пирки доклад туса пачĕ. Августăн 21-мĕшĕ тĕлне районта 26 пушар тухнă, вĕсенче тăватă çын вилнĕ. Çынсен пурнăçне татнă пушарсен сăлтавĕ _ пирус туртнă чухне тата вут- çулăмпа асăрханусăр пулни, электрооборудованипе правилăсене пăсса усă курни. Пушарсен хисепĕ кăçал Хĕрлĕ Чутай, Штанаш, Тралькасси, Атнар ял тăрăхĕсенче ỹснĕ. Чрезвычайлă лару-тăрусем ан пулччăр, пушарсем ан тухчăр тесе пушар хуралĕн ĕçченĕсем, ял тăрăхĕсен специалисчĕсемпе депутачĕсем халăхпа тĕл пулсах тăраççĕ, рейдсем ирттереççĕ. Кашни ял тăрăхĕнчех хăйсен ирĕкĕпе йĕркеленĕ пушар дружинисем пур. Николай Петров пухăннисене пушарсемпе çыхăннă республикăри лару-тăрупа, пушар хăрушсăрлăхĕн хăш-пĕр правилисемпе паллаштарчĕ, залра ларакансен ыйтăвĕсем çине хуравларĕ. Инкек-синкек ан тухтăр тесе чи малтанах пирĕн хамăрăн тăрăшмалла. Паян эпир этемлĕх пушартан асăрханмалли çĕршер çул каялла пăхса хунă правилăсемпе пурăнатпăр, анчах çаплах вĕсене пăхăнма вĕренсе çитейместпĕр пулас. А.КАРПОВА.