27 августа 2014 г.
Ырă йăлана тăснă май кăçал та районта черетлĕ хут "Пуласлăх _ пирĕнте!" çамрăксен фестивалĕ иртнĕ. Çамрăк специалистсене, студентсене района илĕртес тĕллевпе йĕркеленĕ фестиваль программи пуян та интереслĕ пулнă. Унпа килĕшỹллĕн малтанах çамрăксем Хĕрлĕ Чутай райповĕн "Четайское" ТЯО-на, "Çын тата çут çанталăк" музее, "Коминтерн" ЯХПК-на, Атнар ял тăрăхĕн администрацине, Николай Лисаев фермер хуçалăхне çитсе курнă. Каярахпа район администрацийĕн ларусен залĕнче Александр Башкиров хутшăннипе "Район пуласлăхĕ тата татса памалли ыйтусем" темăпа çавра сĕтел пулнă. Фестивалĕн малалли пайĕ Культурăпа кану центрĕ умĕнче иртнĕ. Район пуçлăхĕн премине кăçал районти тĕп больницăн пĕтĕмĕшле практика врачĕ Марина Селянкина, тĕп библиотекăн библиографĕ Алина Михеева, "Свобода" колхоз тракторисчĕ Александр Токарев, "Хастар" ФСК-н тренер-преподавателĕ Татьяна Сергеева тивĕçнĕ. Асăннă çамрăксем районта тĕрлĕ сферăра тỹрĕ кăмăлпа вăй хураççĕ, коллективра та вĕсем хисепре. А.ЗАМУТКИНА.