01 сентября 2014 г.
Паян, августăн 30-мĕшĕнче, халăха çут çанталăка упрама вĕрентес, çамрăксемпе ачасене экологи культурине хăнăхтарас тĕллевпе çĕр-шывра "Симĕс Раççей" Пĕтĕм Раççейри экологи субботникĕ" акци иртет. Иртнĕ çул экологи субботникне обществăлла экологи организацийĕсем, студентсемпе активистсем, халăх хастар хутшăннă. Çĕр-шыври 72 регионта пурăнакан 2,6 миллион çын тавралăха тирпей-илем кỹме тухнă. Акципе килĕшỹллĕн кăçал та республикăра тĕрлĕ мероприятисем _ субботниксем, агитбригадăсен концерчĕсем, савăнăçлă митингсем, куравсем, экологи тематикипе конкурссем _ иртеççĕ. Пирĕн районта та акцие активлă хутшăнса массăллă субботника тухма палăртнă. Калас пулать, халăхпа тухса тăван тавралăха тирпей-илем кỹресси _ районта йăлана кĕнĕ пулăм. Акă райадминистрацин, предприятисемпе организацисен ĕçченĕсем кашни эрнерех территорисене тирпейлеме тухаççĕ. Урамсене шăпăрпа шăласси, ỹссе кайнă курăксене алла çава тытса çуласси вĕсемшĕн йывăр ĕç мар. Ку енĕпе район администрацийĕн пуçлăхĕ Александр Башкиров хăй час-часах тĕслĕх кăтартать. _ Пуçлăх çава тытса çулни намăсла пулăм тесе шутламастăп. Кашни çыннăн çут çанталăка, тавралăха хăтлăхпа илем кỹме, упрама тăрăшмалла. Районта пурăнакансем асăннă субботника хастар хутшăнасса шанатăп. Хамăр пурăнакан вырăн яланах илемлĕ, таса пултăр, _ тет Александр Викторович.