08 сентября 2014 г.
Ĕнер, сентябрĕн 5-мĕшĕнче, СССР авиаци генерал-майорĕ, Совет Союзĕн икĕ хут Геройĕ Андриян Григорьевич Николаев пурăннă пулсан 85 çул тултарнă пулĕччĕ. Андриян Григорьевич _ космоса парăнтарас тата ракета техникине аталантарас ĕçе пысăк тỹпе хывнă çын. 1962 çулхи август уйăхĕнче вăл "Восток-3" тата П.Р.Попович "Восток-4" карапсем çинче тĕнчере пĕрремĕш хут ушкăнла вĕçев тунă. Космоса парăнтарас тĕлĕшре çакăнтан çĕнĕ тапхăр пуçланнă.
Иккĕмĕш хутĕнче Андриян Николаев командир пулса 1970 çулхи июнь уйăхĕнче "Союз-9" карап çинче В.И.Севастьяновпа пĕрле вĕçнĕ. Пирĕн ентеш хăйĕн паттăрла ĕçĕсемпе Чăваш Ене тата Раççее чапа кăларнă, пĕтĕм пурнăçне çĕр-шыва халалланă.
Андриян Николаев çуралнăранпа 85 çул çитнине чысласа республикăра, уйрăмах Сĕнтĕрвăрри районĕнче, тĕрлĕ мероприятисем иртнĕ, вăл шутра савăнăçлă митинг та. Унта хутшăнма ЧР Пуçлăхĕ Михаил Игнатьев чĕннипе хаклă та хисеплĕ хăнасем килсе çитнĕ. Вĕсен йышĕнче: "Роскосмос" космос агентствин ертỹçи Олег Остапенко, РФ Президенчĕ çумĕнчи Чăваш Республикин полномочиллĕ представителĕ Леонид Волков, Валентина Терешковапа Андриян Николаев летчик-космонавтсен хĕрĕ Алена Терешкова, унăн мăшăрĕ Андрей Радионов тата ывăлĕ Андрей, СССР летчик-космонавчĕ Алексей Леонов, РФ летчик-космонавчĕ Николай Бударин тата ыттисем. Ку мероприятие район делегацийĕ те хутшăннă.
А.ЗАМУТКИНА.