Публикации » Çанталăк - хĕвеллĕ, кăмăл - ырă, спортсменĕсем - маттур!

15 сентября 2014 г.

Спорта юратакансен, район хаçатне кăмăллакансен уявĕ сентябрĕн 10-мĕшĕнче иртрĕ. Юн кун кăнтăрла иртсен Хĕрлĕ Чутай салин Тĕп стадионĕ хаваслă сассемпе, юрă-кĕвĕпе тулма пуçларĕ. Спортсменсем тата мероприятие йĕркелекенсем пухăнса çитсен кăçалхипе пиллĕкмĕш хут прессăн спорт фестивалĕ _ "Пирĕн пурнăç" хаçат парнисемшĕн тата А.Г.Николаев летчик-космонавта асăнса çăмăл атлетика эстафета чупăвĕ _ пуçланчĕ. Палăртмалла, Чăваш Енри прессăн спорт фестивалĕ икĕ тапхăрпа иртет: пĕрремĕшĕ _ районсенче, иккĕмĕшĕ _ "Советская Чувашия" хаçат парнисене çĕнсе илессишĕн паян Шупашкарта пулать. Спорт уявне пухăннисене ЧР Патшалăх Канашĕн депутачĕ Валерий Павлов, район пуçлăхĕ Александр Степанов, райадминистрацин ĕçĕсен управляющийĕ Юрий Ямсков, "Пирĕн пурнăç" район хаçачĕн тĕп редакторĕ Алина Оринова, ăмăртусен тĕп судйи Алексей Никитин саламларĕç, спортсменсене ăнăçу сунчĕç. Унтан массăллă зарядка иртрĕ. "Хастар" ФСК тренерĕ Татьяна Сергеева пурне те _ спортсменсене те, курма пынисене те _ савăнăçлă ташă кĕввипе вăй-хала çĕклекен тата кăмăла уçакан ансат хăнăхтарусем тутарчĕ. Часах "Старта! Хатĕрленĕр! Марш!" команда янăрарĕ, районти организацисемпе предприятисен, ял тăрăхĕсен, шкулсемпе ача сачĕсен ушкăнĕсем пĕрин хыççăн тепри çил пек вирхĕнсе чупрĕç, финиша пуринчен те малтан çитме васкарĕç. Мала тухассишĕн пурте хастар тупăшрĕç. Эстафетăсенче вара, хăйсем пуринчен те вăйлăрах пулнине ĕнентерсе, çак ушкăнсем çĕнтерчĕç: _ Спорт çемйисем хушшинче Калкассинчи Алексеевсен çемйи палăрчĕ, вĕсем район хаçатне çур çул хушши тỹлевсĕр илсе тăрĕç. _ Пĕтĕмĕшле пĕлỹ паракан тĕп шкулсем хушшинче Хусанушкăнь шкулĕн спортсменĕсене çитекенни пулмарĕ, Шулю шкулĕн вĕренекенĕсем иккĕмĕш вырăна тухрĕç, Штанаш шкулĕн команди _ виççĕмĕш. _ Пĕтĕмĕшле пĕлỹ паракан вăтам шкулсем хушшинче пĕрремĕшпе иккĕмĕш вырăнсене Çĕн Атикасси шкулĕн командисем тухрĕç, виççĕмĕшне _ Хĕрлĕ Чутай шкулĕн спортсменĕсем. Çакна палăртма кăмăллă, Мăн Этмен, Атнар тата Питĕркасси шкулĕсенче 7-9-мĕш классенче вĕренекенсем те эстафетăна активлă хутшăнса лайăх кăтартусемпе палăрчĕç. _ Хĕрарăмсем хушшинче Хĕрлĕ Чутай райповĕн пикисем пĕрремĕш вырăн йышăнчĕç, иккĕмĕшне _ "Пилеш" ача сачĕн команди, виççĕмĕшне _ "Пирĕн пурнăç" хаçат редакцийĕн ушкăнĕ. _ Арçынсен ушкăнĕнче "Хастар" физкультурăпа спорт комплексĕн маттур спортсменĕсем палăрчĕç _ вĕсем пĕрремĕш тата виççĕмĕш вырăнсене тивĕçлипех çĕнсе илчĕç, иккĕмĕш вырăна райпо команди тухрĕ. _ Ял тăрăхĕсен пĕрлештернĕ командисем хушшинче хĕрлĕчутайсем мала тухрĕç, иккĕмĕш вырăнта _ ачкассисем, виççĕмĕш _ пантьăксем. _ Тĕп ушкăнра район больницин команди палăрчĕ, патшалăх влаçĕн тата вырăнти хăй тытăмлăх органĕсен ушкăнĕсем хушшинче _ район администрацийĕн команди. _ Спорт ветеранĕсем хушшинче Ачкассипе Питĕркасси ял тăрăхĕсен пĕрлештернĕ "Ветерансем чунпа ватăлмаççĕ" ушкăнĕ маттур пулни сисĕнчĕ. Çĕнтерỹçĕсем пурте район администрацийĕнчен Хисеп грамотисене, укçан хавхалантарăва, "Пирĕн пурнăç" хаçат парнисене _ район хаçатĕнче пĕр хут тỹлевсĕр пĕлтерỹ е салам пичетлеме ирĕк паракан купона _ тивĕçрĕç. ЧР Патшалăх Канашĕн депутачĕ В.Павлов пĕрремĕш вырăна тухнă виçĕ ушкăна _ тĕп тата вăтам шкулсене, арçынсен командине _ пылак парнесем парса чысларĕ. Çавăн пекех райпо прессăн спорт фестивальне пухăннисене тỹлевсĕрех вĕри чей ĕçтерчĕ. Хĕрлĕчутайсем паян Шупашкарти "Энергия" стадионта "Советская Чувашия" хаçат парнисемшĕн иртекен 76-мĕш эстафетăна тивĕçлĕ хутшăнса малти вырăнсене йышăнасса шанатпăр. А.КАРПОВА.