17 сентября 2014 г.
Сентябрĕн 12-мĕшĕнче ял хуçалăх предприятийĕсен ертỹçисен канашлăвĕ иртнĕ. Канашлăва район администрацийĕн ял хуçалăх пайĕн начальникĕ Владимир Храмов, ял хуçалăх пайĕн специалисчĕсем, выльăх-чĕрлĕх чирĕсемпе кĕрешекен районти станци начальникĕн тивĕçĕсене пурнăçлаканĕ Наталья Ванюшкина, "Россельхозцентрăн" Етĕрнери филиалĕн тĕп агрономĕ Эльвира Семенова хутшăннă. Канашлăва хутшăнакансем кăçалхи сакăр уйăхри ĕçсене пĕтĕмлетнĕ. Владимир Храмов доклад туса панă.
Сентябрĕн 1-мĕшĕ тĕлне районти пур категориллĕ хуçалăхсем чĕрĕ виçепе 1854,69 тонна (иртнĕ çулхипе танлаштарсан 104,2 процент) аш туса илнĕ, вăл шутра ял хуçалăх предприятийĕсем _ 537,65 тонна (103,6 процент), уйрăм хушма хуçалăхсем _ 1315,10 (104,3 процент), хресченпе фермер хуçалăхĕсем _ 1,94 тонна (215,6 процент).
Ĕнесенчен сĕт суса илесси те ỹснĕ. Пĕтĕмпе пур категориллĕ хуçалăхсенче 17110,7 тонна сĕт сунă (104 процент). Вăл шутра ял хуçалăх предприятийĕсем 3085,8 тонна суса илнĕ, иртнĕ çулхи çак вăхăтрипе танлаштарсан 115 процент. Мăйракаллă шултра выльăхсен хисепĕ 9887 пуçпа танлашать (99,8 процент). Ĕнесен шучĕ те кăштах чакнă (98,8 процент), сыснасен тата сурăхсемпе качакасен йышĕ вара хушăннă (103,4 тата 112,3 процент). Ял хуçалăх предприятийĕсенче 2454 пуç мăйракаллă шултра выльăх шутланать.
Выльăх шутне ỹстерес тата сыхласа хăварас тĕллевпе "Коминтерн" хуçалăх халăхран 115 пуç çамрăк выльăх, унсăр пуçне 29 пуç ăратлă сысна туяннă. Хресченпе фермер хуçалăхĕн пуçлăхĕ, уйрăм предприниматель А.В.Мурайкин 11 пуç ăратлă пушмак пăру илнĕ. Н.И.Лисаев фермер 42 пин бройлер чĕппи, вăл шутра 10 пин кăвакал чĕппи ỹстерсе сутмашкăн туяннă. Çулталăк пуçланнăранпа хресченпе фермер хуçалăхĕсенче мăйракаллă шултра выльăхсен шучĕ 68 пуç, 26 ĕне, 17 сысна, 33 сурăх хушăннă. А.ДМИТРИЕВА.