24 сентября 2014 г.
Районти полици уйрăмне пĕр хĕр заявленипе çитрĕ, хăйĕн малтанхи каччи правăна хирĕç ĕçсем тунине пĕлтерчĕ. Кăçалхи август уйăхĕн 22-мĕшĕнче каçхи тăхăр сехет тĕлнелле хĕр хăйĕн малтанхи савнийĕпе Хĕрлĕ Чутай салинче тĕл пулнă. Çамрăксем тĕл пулу пирки малтанах калаçса татăлнă-мĕн. Каччă сăмахĕсем тăрăх, вăл хĕрĕн ун патĕнче юлнă япалисене тавăрма шутланă. Тĕл пулсанах пике хăйĕн япалисене ыйтнă. Анчах та арçын чăрсăрланма пикеннĕ, малтанхи савнийĕн сумкине йăтса парса пулăшма ыйтнă. Хĕр килĕшмен. Çавăн чухне каччă унăн аллине хуçма тытăннă. Ыратнине тỹсейменнипе хĕр аллинчи сумкине вĕçертсе янă. Ăна каччă ярса илнĕ, сумкинчен телефонне кăларнă. Унăн сим-карттипе флешкине те кăларса илнĕ, унтан вĕсене каялла хунă. Хĕр телефонне ыйтсан сăпайсăр арçын ăна хăйĕн аллипе пит çăмартийĕнчен пĕр хутчен çапнă, унтан сумкипе ытти япалисене хăварса кайнă. Телефонне пĕрле илнĕ. Ăна вăл 2014 çулхи июнь уйăхĕнче хĕрĕ умĕнчи парăмне саплаштарма туянса панă пулнă. Телефон хакне 4 500 тенкĕ тесе палăртать асап тỹсекенни. Паянхи кун ниçта та ĕçлемен хĕршĕн палăртнă сумма самаях пысăк. Асăннă фактпа РФ УК-ан 161 статйин 2-мĕш пайĕпе (çаратни) уголовлă ĕç уçрăмăр, ăна суда ярса патăмăр.
Э.КОНДРАТЬЕВ, районти полици уйрăмĕн следователĕ.