29 сентября 2014 г.
Октябрĕн 1-мĕшĕччен йышăну тумалла Федераци çăмăллăхĕсемпе усă куракансен 2015 çулта соцпакетпа мĕнле усă курасси пирки йышăну тăвас пулать: пулăшусемпе усă курĕç е уншăн уйăхсерен укçа илсе тăрĕç. Енчен те çăмăллăхсемпе усă куракан çын унччен соцпакетпа усă курнă йĕркене улăштарасшăн пулсан, унăн октябрĕн 1-мĕшĕччен Пенси фондне пырса заявлени çырса памалла. Калăпăр, халĕ вăл çăмăллăхсемшĕн укçан илсе тăрать, çитес çултан тытăнса вара çăмăллăхсемпе усă курасшăн е тепĕр майлă. Енчен те çăмăллăхсемпе усă куракан çын соцпакетпа халĕ усă куракан йĕркене улăштарасшăн мар пулсан, унăн Пенси фондне пыма кирлĕ мар. Соцпакет виçĕ пайран тăрать: эмел, санаторипе курорт тата транспорт. Соцпакетпа пĕтĕмĕшле те е унăн кирек хăш пайĕпе уйрăмшар та усă курма пулать. Федераци çăмăллăхĕсемпе усă куракансен соцпакет хакĕ хальхи вăхăтра уйăхне 881 тенкĕ те 63 пуспа танлашать. Вăл шутран эмелсемпе врач рецепчĕсемпе тỹлевсĕр тивĕçтересси _ 679 тенкĕ те 5 пус, санаторипе курорт сипленĕвĕ (врач сĕннипе санаторисене кайма путевкăпа тивĕçтересси) _ 105 тенкĕ те 5 пус, транспорт пайĕ (хула çывăхĕнчи пуйăссемпе тỹлевсĕр çỹресси тата санаторие тỹлевсĕр кайса килесси) _ 97 тенкĕ те 53 пус.
Алина ЕЖЕЕВА, РФ Пенси фончĕн районти уйрăмĕн начальникĕ.